శబరిమల అయ్యప్ప జన్మదిన వేడుకల్లో అపశ్రుతి.. !

ప్రముఖ పుణ్యక్షేత్రం శబరిమల అయ్యప్పస్వామి ఆలయంలో స్వల్ప తొక్కిసలాట చోటుచేసుకుంది. శుక్రవారం చైత్ర శుద్ధ చతుర్దశి కావడంతో శబరిమలలో అయ్యప్ప జన్మదిన వేడుకలను నిర్వహిస్తున్నారు. ఈ వేడుకలు జరుగుతున్న వేళ, ఉత్సవాల్లో అపశ్రుతి చోటు చేసుకుంది. స్వామివారి ఊరేగింపు నీలిమలలో సాగుతుండగా, ఉత్సవమూర్తిని ఊరేగించడానికి తెచ్చిన ఏనుగు బెదిరి అదుపుతప్పి పరుగులు పెట్టింది. దీంతో భయపడిపోయిన భక్తులు, ఒక్కసారిగా పరుగులు తీశారు. ఈ సమయంలో తొక్కిసలాట చోటుచేసుకోవడంతో పలువురు భక్తులు, పోలీసులకు గాయాలయ్యాయి. గాయపడిన వారిలో ముగ్గురు పరిస్థితి విషమంగా ఉన్నట్టు సమాచారం.

స్వామి విగ్రహాన్ని ఏనుగుపై ఊరేగిస్తుండగా, అది పరుగులు పెట్టడంతో ఉత్సవ మూర్తి కిందపడిపోయారు. ఇలా జరగడం అపచారంగా భావించిన ఆలయ పూజారులు పరిహార పూజలు చేశారు. ఆపై మావటీలు చాలాసేపు శ్రమించి ఏనుగును అదుపులోకి తేవడంతో అందరూ ఊపిరి పీల్చుకున్నారు. చైత్రమాసం, ఉత్తరా నక్షత్రం, చతుర్దశి తిథిలో హరిహరసుతుడు అయ్యప్పస్వామి జన్మించారు. అందుకే ఈ రోజున ఏటా శబరిమలలో అయ్యప్ప పుట్టిన రోజు వేడుకలను నిర్వహిస్తారు.