సూర్యుడి కుమార్తెను పెళ్లాడిన హనుమ!

హనుమంతుడిని బ్రహ్మచారిగా పేర్కొంటారు. సీతాన్వేషణ కోసం లంకలో ప్రవేశించిన ఆంజనేయుడి తోకకు నిప్పంటించానికి రావణుడు ప్రయత్నించాడు. ఆ నిప్పుతోనే లంకను కాల్చి సముద్రం దాటుకుంటూ వస్తున్నప్పుడు హనుమ శ్వేధాన్ని ఓ చేప మింగి గర్భం దాల్చినట్లు ఓ పురాణ కథ ప్రచారంలో ఉంది. ఆ చేపకు జన్మించిన వాడే మకరధ్వజుడు. అతడినే ఆంజనేయుడి కొడుకుగా పేర్కొంటారు. అయితే పరాశర సంహితలో మాత్రం హనుమంతుడికి వివాహం జరిగినట్లు తెలిపారు.

పరాశర మహర్షి తెలిపిన ప్రకారం సూర్యుడినే తన గురువుగా హనుమంతుడు ఆరాధించాడు. ఒక్క నవవ్యాకరణం తప్ప సూర్యుడి నుంచి సకల విద్యలు, వేదాలను హనుమంతుడు అభ్యసించాడు. బ్రహ్మచారి కావడంతో గృహ‌స్థులకు మాత్రమే అర్హమైన నవవ్యాకరణాన్ని నేర్చుకోలేకపోతాడు. విద్యాభ్యాసం పూర్తి కావాలంటే ఆంజనేయుడు తప్పనిసరిగా వివాహం చేసుకోవాలని భావించిన సూర్యుడు త్రిమూర్తుల సూచన మేరకు తన కిరణాల, కాంతితో సువర్చల దేవి అనే యువతిని సృష్టించాడు.

ఈమే అయోనిజ అంటే యోని ద్వారా జన్మించని మహిళ. సువర్చలతో వివాహాన్ని సూర్యుడు నిర్ణయించినా హనుమంతుడు నిరాకరిస్తాడు. తాను ఆజన్మ బ్రహ్మచారిని కాబట్టి, తన ప్రతిఙ్ఞకు భంగం కలుగుతుందని సంశయం వ్యక్తం చేశాడు. గురుదక్షిణ కింద తన కుమార్తె సువర్చలను వివాహం చేసుకోవాలని సూర్యుడు ఆఙ్ఞాపించాడు. అంతేకాదు సువర్చల దేవ కన్య.... ఆమెను వివాహం చేసుకున్నా నీ బ్రహ్మచర్యానికి ఎలాంటి నష్టం జరగదు... ఇది లోక కల్యాణం కోసమే జరుగుతున్న కార్యమని సూర్యుడు ఒప్పించాడు. వివాహం అయిన మరుక్షణమే సూర్య పుత్రిక తపస్సుకు ఉపక్రమించింది. దక్షిణ భారత దేశంలో సువర్చలదేవి పేరుతో ఈమె పూజలందుకుంటుంది. ప్రస్తుతం ఈ ఆలయం ఖమ్మం జిల్లాలోని పందిళ్లపల్లిలో ఉంది. ఈ ఆలయాన్ని దర్శించినవారికి ఎలాంటి ఒడిదొడుకులు లేకుండా వైవాహిక జీవితం సాగుతుంది.