దీపావళి రోజు లక్ష్మీపూజలో ఈ దోషాలు చేయకండి?

భారతీయుల పండుగల్లో దీపావళికి విశేష ప్రాధాన్యత ఉంది. ద్వాపర యుగంలో నరకాసుర సంహారం తర్వాత తొలిసారిగా దీపావళి జరుపుకున్నామని కొందరు పేర్కొంటే, రావణ సంహారం గావించిన రాముడు తిరిగి ఆయోధ్యలో అడుగుపెట్టిన సందర్భంగా ప్రజలు సంతోషంతో దీపాలు వెలిగించి పండుగను చేసుకున్నారని కొందరు అంటారు. ఏది ఏమైనా చెడుపై మంచి సాధించిన విజయానికి గుర్తుగా జరుపుకునే దివ్వెల పండుగ లక్ష్మీదేవిని పూజించడం ఆనవాయితీ. ఈ రోజు లక్ష్మీదేవి ఆరాధిస్తే అష్టఐశ్వర్యాలు లభిస్తాయని నమ్మకం. అయితే పూజించేటప్పుడు కొన్ని నియమాలను తప్పనిసరిగా అనుసరించాలి.

లక్ష్మీ పూజ చేసినప్పుడు తులసిని పూజించరాదు. ఎందుకంటే విష్ణు అంశంతో జన్మించిన శాలిగ్రామను తులసి వివాహం చేసుకుంది. లక్ష్మీదేవి, విష్ణువు భార్యభర్తలు కాబట్టి ఆ సమయంలో తులసిని పూజించిడం వల్ల ప్రయోజనం ఉండదు.

మట్టి ప్రమిదలో దీపాన్ని వెలిగించి కుడివైపు ఉంచాలి. దేవతల్లో ఉత్తముడైన విష్ణువు ప్రపంచానికి వెలుగును ప్రసాదిస్తాడు. ఆయన పత్ని లక్ష్మీ కాబట్టి కుడివైపు దీపం వెలిగించాలి.

తెలుపు రంగు పూలతో పూజచేయరాదు. ఎరుపు, గులాబీ రంగు పూలతోనే పూజించాలి. లక్ష్మీదేవి విగ్రహాన్ని కూడా తెలుపు రంగు వస్త్రంపై ఉంచరాదు. ఒక్క శనిదేవుడికి తప్ప మిగతా దేవతలను పూజించేటప్పుడు తెలుపు, నలుపు రంగు వస్త్రాలను వాడరాదు.

విఘ్నేశ్వరుడు, లక్ష్మీ పూజ చేసిన తర్వాత విష్ణుమూర్తిని తప్పనిసరిగా పూజించాలి. అమ్మవారికి సమర్పించే నైవేద్యాన్ని దక్షిణ దిశలో ఉంచాలి. ఫలాలు, పుష్పాలను కూడా ఇదే దిశలో అమర్చాలి. పూజ పూర్తయిన తర్వాత కుటుంబ సభ్యులంతా ప్రసాదం తీసుకోవాలి.

అందమైన రంగవల్లికలు ఇంటికి ఆందాన్ని ఇవ్వడమే కాదు, శ్రేయస్సు కూడా కలుగుతుంది. నిరు పేదలకు వస్త్రాలు లేదా అన్నదానం చేయడం వల్ల పుణ్యఫలం లభిస్తుంది.