అక్బర్ చక్రవర్తి గురించి చరిత్రకు తెలియని నిజాలు!

భారతదేశ చక్రవర్తిగా కీర్తి సంపాదించిన మొఘల్ చక్రవర్తి అక్బర్ క్రీస్తు శకం 1556 నుంచి 1605 వరకు పరిపాలించారు. గొప్ప పాలనాదక్షుడిగానూ, లౌకికవాదిగానూ ప్రజల నుంచి మన్ననలందుకున్న అక్బర్ చక్రవర్తి జీవితంలో మాత్రం నిజమైన ప్రేమకు చోటే లేదట. ఈ విషయం బెల్జియం రచయిత డిర్క్ కొలాయర్ రాసిన ఏ ఫిక్షనల్ ఆటోబయోగ్రఫీ ఆఫ్ మొఘల్ కింగ్ అక్బర్ పుస్తకంలో పేర్కొన్నారు.

అక్బర్ తన కుమారుడు జహంగీర్‌కు రాసిన లేఖను చారిత్రక వాస్తవాలు, చక్రవరి రచనలు పేరుతో ఈ పుస్తకంలో పేర్కొన్నారు. ఇందులో అక్బర్ వ్యక్తిగత జీవితానికి సంబంధించిన అనేక ఆసక్తికరమైన అంశాలను ప్రస్తావించారు. అక్బర్ చక్రవర్తి జీవితంలో 5 వేల కంటే ఎక్కువ మంది స్త్రీలు ఉన్నట్లు రచయిత వివరించారు. అయితే జహంగీర్, షాజహాన్‌ లాంటి ఇతర మొఘల్ చక్రవర్తులతో పోల్చుకుంటే అక్బర్ అంత రొమాంటిక్ పర్సన్ కాదట.

చాలా మంది స్త్రీలతో సంబంధాలు నెరపినా వారిపై నిజమైన ప్రేమను మాత్రం చూపలేదట. 5000 మంది మహిళలు అక్బరు జీవితంలో ఉన్న వారిలో 300 మందిని మాత్రమే భార్యలుగా, ఉపపత్నులగానూ స్వీకరించాడట. చారిత్రక ఆధారాలు ప్రకారం జోధాతో అక్బర్ ప్రేమకథకు ఎలాంటి సాక్ష్యాలు లేవట. అయితే చరిత్రకారుల ప్రకారం జోధా అసలు పేరు మరియమ్-ఉజ్-జమానీ. ఇతర భార్యల కంటే ఈమే ఎందుకు ప్రత్యేకమంటే అందరి కంటే ముందు మొఘల్ సామ్రాజ్యానికి జహంగీర్‌ను వారసుడిగా ఇచ్చింది కాబట్టి. జహంగీర్ తన భార్య నూర్జహాన్‌ పట్ల, అతడి కుమారుడు షాజహాన్ ముంతాజ్ బేగం పట్ల నిజమైన ప్రేమను చాటుకున్నారు. అయితే అక్బర్ మాత్రం తన జీవితంలో ఎవరికీ ప్రేమను పంచలేదట.