ఈ హనుమంతుడి విగ్రహం కొబ్బరి కాయలను పగలగొడుతుంది!

గుజరాత్‌లోని సరంగ్‌పూర్ జిల్లాలోని ఆంజనేయుడి దేవాలయాన్ని భక్తులు పెద్ద సంఖ్యలో దర్శించుకుంటారు. అయితే ఈ ఆలయానికి ఓ ప్రత్యేకత ఉంది. ఇక్కడ ఉండే హనుమంతుడి విగ్రహం చాలా ప్రత్యేకమైంది. భక్తులు తన నోట్లో వేసిన కొబ్బరి కాయలను ముక్కలుచేసి ఆశీర్వదిస్తుంది. దేవాలయం వెలుపల ఏర్పాటుచేసి ఈ విగ్రహం సందర్శకులను విశేషంగా ఆకర్షిస్తుంది. ఈ ఆంజనేయుడి నోటిలో వేసిన కొబ్బరి కాయను రెండు ముక్కలై విగ్రహం చేతుల్లోకి వస్తుంది. ఇదేలా సాధ్యం, ఇందులో రహస్యం ఏంటనే సందేహం ప్రతి ఒక్కరికీ కలుగుతుంది.

హిందూ దేవాలయాల్లో కొబ్బరి కాయను కొట్టడం సంప్రదాయాన్ని పాటిస్తారు. ఎందుకంటే దీని వల్ల మంచి జరుగుతుందనేది ప్రజల భావన. ఈ సంప్రదాయం ఆలయాల్లో కొనసాగుతున్నా శుభ్రతపై మాత్రం తీవ్ర ప్రభావం చూపుతుంది. ఆలయాల పరిసరాల పరిశుభ్రత కోసం చాలా మంది కార్మికులు పనిచేస్తుంటారు. ఇలాంటి ఇబ్బందులు అధిగమించడానికి సరంగ్‌‌పూర్ దేవాలయ కమిటీకి ఓ ఐడియా వచ్చింది. ఆ ఐడియా ఫలితమే విగ్రహం నోట్లో కొబ్బరి కాయలు పగలడం.

కొబ్బరి కాయలను పగలగొట్టే యంత్రాన్ని కొనుగోలు చేసి ఆలయం బయట ప్రత్యేకంగా హనుమంతుడి విగ్రహాంలో ఏర్పాటు చేశారు. కాబట్టి భక్తులు నోట్లో కొబ్బరి కాయలు వేస్తే లోపలి ఉండే యంత్రం రెండుగా విడగొడుతుంది. విడిపోయిన రెండు భాగాలు విగ్రహం చేతిలో నుంచి బయటకు వస్తాయి. గతేడాది ఈ విగ్రహాన్ని ప్రతిష్ఠించారు. దీనిని దర్శించుకోడానికి భక్తులు తండోపతండాలుగా వస్తున్నారు.