నేటి రాత్రి గజవాహనంపై ఊరేగనున్న శ్రీవారు

తిరుమలలో శ్రీవారి సాలకట్ల బ్రహోత్సవాలు అంగరంగా వైభవంగా జరుగుతున్నాయి. బ్రహోత్సవాల్లో భాగంగా ఆరో రోజు ఉదయం శ్రీవారి హనుమంత వాహనంపై భక్తులకు దర్శనమిచ్చారు. త్రేతాయుగం నాటి శ్రీరాముడను నేనేనని.. వేంకటాద్రి రాముడుగా భక్తులకు దర్శనమిచ్చారు. ఈ వాహన దర్శనంతో మంచి స్నేహితులు లభ్యమవుతారని పండితుల అభిప్రాయం. ఈ సేవ ఉదయం 11గంటల వరకు సాగింది. హనుమంతుడు శ్రీరాముడికి సేవలందించిన తీరును ప్రస్ఫుటించేలా ఈ సేవ జరుగుతోంది. గోవింద నామస్మరణలతో సప్తగిరులు మార్మోగుతున్నాయి. తిరుమాడ వీధులు భక్తజనసంద్రాన్ని తలపిస్తున్నాయి. నేటి సాయంత్రం స్వర్ణ రథోత్సవం, ఆ తర్వాత గజవాహన సేవలు జరగనున్నాయి. ఈ రోజు రాత్రి మలయప్పస్వామి మాత్రమే గజరాజుపై ఊరేగుతూ భాగవతంలోని గజేంద్రమోక్షం వృత్తాంతాన్ని స్మరింపజేస్తారు. భక్తులకు లక్ష్మీ కటాక్షాన్ని ప్రసాదిస్తూ తిరువీధుల్లో వైభవంగా ఊరేగుతారు.

బుధవారం జరిగిన గరుడ సేవకు వేలాదిగా భక్తులు తరలివచ్చారు. కలియుగ వైకుంఠంలో భక్తకోటి పులకించిపోయింది. దేవదేవుడు తిరువేంకటనాథుడిని సేవించి తరించారు. కన్నుల పండవగా సాగిన గరుడోత్సవంలో అర్థరాత్రి వరకు స్వామివారు తిరు మాడ వీధుల్లో విహరించారు. గ్యాలరీలు నిండిపోవడం, వేలాది మంది వాటి ప్రధాన ద్వారాల వద్ద వేచి ఉండి తమను లోపలికి పంపాలని పోలీసులతో వాగ్వాదానికి దిగారు. సరిగ్గా రాత్రి 7: 30 గంటలకు వాహన మండపం తెరతీసి గరుడ వాహానాన్ని అధిరోహించిన శ్రీవారి దర్శనం కల్పించారు.