తిరుమలలో బ్రహ్మోత్సవ శోభ.. శ్రీవారికి పట్టు వస్త్రాలు సమర్పించిన సీఎం చంద్రబాబు

తిరుమలలో కలియుగ దైవం వెంకటేశ్వర స్వామి వార్షిక బ్రహోత్సవాలు వైభవంగా ప్రారంభమయ్యాయి. సాయంత్రం ధ్వజారోహణం నిర్వహించాక.. ఏపీ ప్రభుత్వం తరఫున సీఎం చంద్రబాబు శ్రీవారికి పట్టు వస్త్రాలు సమర్పించారు. ముందు సీఎం, సతీమణి భువనేశ్వరి, మంత్రి నారా లోకేశ్‌, బ్రాహ్మణి, దేవాన్ష్‌‌లతో కలిసి అఖిలాండం వద్దబేడీ ఆంజనేయస్వామిని దర్శించుకున్నారు. అనంతరం వేదపండితుల మంత్రోచ్ఛారణల మధ్య పట్టు వస్త్రాలను తీసుకొని మహాద్వారం నుంచి ఆలయంలోకి ప్రవేశించారు. అనంతరం పట్టు వస్త్రాలను సమర్పించి.. శ్రీవారిని దర్శించుకున్నారు. సీఎంతో పాటు మంత్రి అమర్‌నాథ్‌రెడ్డి, టీటీడీ పాలకమండలి ఛైర్మన్‌ పుట్టా సుధాకర్‌ యాదవ్‌, సభ్యులు, ఈవో అనిల్‌కుమార్‌ సింఘాల్‌‌తో పాటూ అధికారులు ఉన్నారు.

అంతకముందు ధ్వజారోహణం కార్యక్రమాన్ని ఘనంగా నిర్వహించారు. వేదపండితుల మంత్రోచ్చారణలు, మంగళవాయిద్యాలతో అష్టదిగ్పాలకులు, సకల దేవతలకు ఆహ్వానం పలుకుతూ స్వామివారి వాహనమైన గరుడుని చిత్రించిన ధ్వజ పటాన్ని మాఢ వీధుల్లో ఊరేగించారు. మహద్వారం గుండా ధ్వజపటంతో ఆలయానికి చేరుకున్నాక బ్రహోత్సవాల పర్యవేక్షకులుగా అర్చకుల తరఫున ఖాద్రి నరసింహాచార్యులు.. బ్రహ్మోత్సవాల నిర్వహణ కోసం యజమానుదారుగా టీటీడీ ఈవో అనిల్‌కుమార్‌ సింఘాల్‌ కంకణం ధరించారు.

అనంతరం ఆలయ ప్రధాన అర్చకులు వేణుగోపాల దీక్షితులు, వేదపండితులు వైఖానస ఆగమ సంప్రదాయాలను అనుసరిస్తూ విశిష్ట పూజలు నిర్వహించి ధ్వజ స్తంభానికి ధ్వజపటంను ఎగురవేశారు. తర్వాత తిరుమలరాయ మండపంలో ఆస్థానం, విశేష సమర్పణ కార్యక్రమం నిర్వహించారు. ధ్వజారోహణ కార్యక్రమంలో టీటీడీ పాలకమండలి ఛైర్మన్‌ పుట్టా సుధాకర్‌యాదవ్‌, సభ్యులు, అధికారులు పాల్గొన్నారు.

రాత్రికి శ్రీదేవి, భూదేవి సమేత శ్రీమలయప్పస్వామి ఏడుపడగల బంగారు పెద్ద శేషవాహనంపై వూరేగ‌నున్నారు. స్వామి శేషవాహనంపై వూరేగడం ద్వారా భక్తులకు ఈ శేషశేషి సంబంధాన్ని స్వామివారు బోధిస్తున్నట్లు దర్శనమిస్తారు. భక్తులకు సౌభాగ్యాలు సిద్ధింపజేస్తారు.