ఈ నెల 23 నుంచి శ్రీవారి బ్రహోత్సవాలు

ఈ ఏడాది శ్రీ వారి వార్షిక బ్రహ్మోత్సవాల తేదీలను తిరుమల తిరుపతి దేవస్థానం ప్రకటించింది. ఈ నెల 22న శ్రీవారి వార్షిక బ్రహ్మోత్సవాలకు అంకురార్పణ జరుగుతుందని, 23న రాత్రి 7 గంటలకు ధ్వజారోహణంతో ఉత్సవాలు ప్రారంభమవుతాయని టీటీడీ పేర్కొంది. అదే రోజు రాత్రి 8 గంటలకు ముఖ్యమంత్రి చంద్రబాబునాయుడు సతీ సమేతంగా స్వామివారికి పట్టు వస్త్రాలు సమర్పిస్తారని టీటీడీ తెలిపింది. 23 వ తేది రాత్రి 9 గంటలకు పెద శేషవాహన సేవ ఉంటుందని, ఆపై వరుసగా నిత్యమూ రెండు వాహన సేవలు ఉంటాయని వెల్లడించింది. 27వ తేదీ రాత్రి 7 గంటలకు జరిగే గరుడవాహన సేవకు అన్ని ఏర్పాట్లూ చేశామని తెలియజేసింది.

28 న సాయంత్రం 5 గంటలకు స్వర్ణ రథోత్సవం, గజవాహన సేవలుంటాయని, 30న రథోత్సవం, అక్టోబరు 1న ఉదయం చక్రస్నానం, ఆపై సాయంత్రం ధ్వజారోహణంతో వార్షిక బ్రహ్మోత్సవాలు ముగుస్తాయని ఓ ప్రకటనలో వెల్లడించింది. సెప్టెంబరు 22 న ప్రారంభమయ్యే బ్రహోత్సవాలు అక్టోబరు 1తో ముగియనున్నాయి. దసరా సమయంలో నిర్వహించే బ్రహ్మోత్సవాలను నవరాత్రి బ్రహ్మోత్సవాలు అంటారు.

అంకురార్పనానికి ముందురోజు సాయంత్రం శ్రీవారి సేనాధిపతులైన శ్రీవిష్వక్సేనులవారు ఆలయానికి నైరుతి వైపున ఉన్న వసంత మండపానికి ఛత్రచామర మంగళ వాద్యపురస్సరంగా వేంచేస్తారు. అనంతరం భూమి పూజ తదితర కార్యక్రమాలు నిర్వహించి స్వామివారు మృత్సంగ్రహణం చేసి ప్రదక్షిణంగా ఆలయంలోకి ప్రవేశిస్తారు. దీంతో తర్వాతి రోజు బ్రహ్మోత్సవాలకు నవధాన్యాలతో అంకురార్పణం జరుగుతుందన్నమాట. ఆ తర్వాత సాయంత్రం 7 గంటలకు మకరలగ్నంలో ధ్వజారోహణ కార్యక్రమం జరుగుతుంది. ఈ ఘట్టంతో స్వామివారి బ్రహ్మోత్సవాలు ఆరంభమవుతాయి. స్వామివారు తొమ్మిది రోజూలు ఒక్కో రూపంలో దర్శనమిస్తారు. బ్రహోత్సవ సమయంలో 16 రకాల వాహనాల్లో శ్రీవారి భక్తులను కనువిందు చేస్తారు.