ఆగస్టు నెలంతా శ్రీవారి ఆలయంలో ఉత్సవాలే ఉత్సవాలు!

ఆగస్టు నెలలో తిరుమలలో అనేక ఉత్సవాలు జరగనున్నాయి. ఆగస్టు 3 న ప్రారంభమయ్యే వేడుకలు చివరి వారం వరకూ కొనసాగనున్నాయి. వీటికి సంబంధించిన వివరాలను టీటీడీ వెల్లడించింది. ఆగస్టు 3న శ్రీ ఆండాళ్ అమ్మ‌వారి తిరువడిపురం శాత్తుమొరను పురస్కరించుకుని పురుశైవారి తోట ఉత్సవం ఘనంగా నిర్వహించనున్నారు. ఈ ఉత్సవం వెనుక పురాణ పాశస్త్యం ఉంది. పురాణాల ప్రకారం పాండ్య దేశంలో పరమ విష్ణుభక్తుడు విష్ణుచిత్తుడి తులసీవనంలో ఆషాడ శుక్ల చతుర్థి నాడు పూర్వఫల్లునీ నక్షత్రంలో భూదేవి అంశగా గోదాదేవి అమ్మవారు ఆవిర్భవించారు. ఈ సందర్భంగా కటక మాసం పూర్వఫల్గుని నక్షత్రంలో ఆండాళ్‌ తిరువడిపురం శాత్తుమొర నిర్వహిస్తారు.

పవిత్రమైన ఈ రోజున సాయంత్రం 5.30 గంటలకు శ్రీదేవి, భూదేవి సమేత శ్రీమలయప్పస్వామి పురుశైవారితోటకు వేంచేపు చేస్తారు. అక్కడ నివేదనల అనంతరం స్వామి, అమ్మవార్లు బయల్దేరి పొగడ చెట్టు వద్దకు రాగానే హారతి ఇస్తారు. హారతి, పుష్పసరం, శ్రీ శఠారి పొగడ చెట్టునకు సమర్పిస్తారు. శ్రీ శఠారికి అభిషేకం అనంతరం తిరిగి తిరుచ్చిపై ఉంచుతారు. అక్కడ నుంచి స్వామి, అమ్మవార్లు ఆలయ మాడ వీధుల గుండా ఊరేగింపుగా శ్రీవారి ఆలయానికి చేరుకుంటారు.

ఆగస్టు 5న గరుడ పంచమి కావడంతో శ్రీవారికి గరుడసేవ నిర్వహించనున్నారు. శ్రీమహావిష్ణువు పరమభక్తుడు గరుత్మంతుడు శ్రావణ శుద్ధ పంచమి నాడు జన్మించినట్టు పురాణాలు పేర్కొంటున్నాయి. అందుకే స్వామివారికి ఆ రోజున ప్రత్యేకంగా గరుడసేవ ఉంటుంది. ఆగస్టు 6న క‌ల్కి జ‌యంతి, ఆగస్టు 9న శ్రీవ‌ర‌ల‌క్ష్మీవ్ర‌తం, మాతృశ్రీ తరిగొండ వెంగమాంబ వర్థంతి నిర్వహిస్తారు. ఇక స్వామివారికి ఆలయంలో ఆగస్టు 11 నుంచి 3 రోజులపాటు పవిత్రోత్సవాలు జరగనున్నాయి. ఈ వేడుకలకు ఆగస్టు 10న అంకురార్పణ చేయనున్నారు. ఆగస్టు 12న నారాయణగిరిలో ఛత్రస్థాపనం, 15న శ్రావణ పౌర్ణమి, హయగ్రీవ జయంతి, శ్రీ విఖనస జయంతి, ఆగస్టు 16న శ్రీవారు శ్రీ విఖనసాచార్యులవారి సన్నిధికి వేంచేయుట, 23న గోకులాష్టమి, ఆగ‌స్టు 24న తిరుమల శ్రీవారి శిక్యోత్సవం నిర్వహించనున్నట్లు తెలిపింది.