ఈ రెండూ వంటగదిలో ఉంటే లక్ష్మీదేవి కొలువుంటుందట!

ఉప్పు, పసుపు ఈ రెండు వంటగదిలో చాలా ముఖ్యమైనవి. ఎంత మంచి కూర వండినా ఉప్పు లేకపోతే రుచి ఉండదు. పసుపుతో ఆహార పదార్థాలు రంగు సంతరించుకుంటాయి. అంతే కాదు దీంతో ఎన్నో ఆరోగ్య ప్రయోజనాలు కూడా ఉన్నాయని అందరికీ తెలుసు. ఉప్పు వల్ల ఇంటికి శ్రేయస్సు కలుగుతుందని మన పెద్దవాళ్లు చెబుతుంటారు. ఒకవేళ్ల ఇంట్లో ఉప్పు దొంగతనం జరిగితే లక్ష్మీదేవి బయటకు వెళ్లడానికి సంకేతమని పేర్కొంటారు.

అదే విధంగా పసుపు లేదా పసుపు కొమ్ములను వినాయకుడి ప్రతి రూపంగా కొలుస్తారు. అలాగే వాస్తు శాస్త్రం ప్రకారం పసుపు, ఉప్పుకు ఇంట్లో సమాన ప్రాధాన్యత ఉంది. వీటి వల్ల ఇంటిలో శాంతి, సంతోషమే కాదు... కుటుంబ ఆరోగ్యానికి, సంపదకు దోహదం చేస్తాయట. అందుకే వీటిని జాగ్రత్త చేసుకోవాలట.

ఈ రెండు వస్తువులు విఘ్నేశ్వరుడు, లక్ష్మీదేవికి ఎంతో ప్రీతికరమైనవి. అయితే వీటిని కలిపి ఉంచితే దరిద్ర దేవత చేరి పేదరికానికి హేతువవుతుందట. కాబట్టి వేర్వేరు ప్రదేశాల్లో వీటిని భద్రం చేసుకోవాలి.

ఎప్పుడూ ఇంటిని ప్రశాంతంగా ఉంచడానికి ప్రయత్నించాలి. దీని వల్ల సంతోషం, సంపద సొంతమవుతాయట. అలాగే ఇంటిలో తలుపులకు అద్దం అమర్చరాదట. దీని వల్ల ప్రతికూలతలు ఎదురవుతాయట.

ప్రవేశం ద్వారం దగ్గర వంటగది ఉంటే కుటుంబ సభ్యులకు జీర్ణ సంబంధ ఆరోగ్య సమస్యలు ఎదురయ్యే ప్రమాదం ఉంది. అలాగే వ్యాధి నిరోధకత కూడా తగ్గిపోతుందట. ఒకవేళ వంటగది మార్చడానికి అవకాశం లేకపోతే కర్టెన్స్ లేదా తలుపులు ఏర్పాటు చేసుకుంటే ప్రతికూలతలు తొలగిపోతాయట.

పూజగదికి ఎప్పుడూ చెక్కతో తయారు చేసిన తలుపులు మాత్రమే ఉపయోగించాలి. మరే ఇతర లోహాలతో చేసిన వాటిని ఉంచరాదట. నైరుతి మూల క్రిస్టల్స్ ఉంచితే ఇంట్లో లేదా ఆఫీసులో అనుకూల వాతావరణం, శాంతి చేకూరుతాయట.

ఉద్యోగం లేకపోయినా, ప్రస్తుతం ఉన్న ఉద్యోగంతో ఇబ్బందులు ఎదుర్కొంటున్నా ఇంట్లో నీటి ఏర్పాట్లను పరిశీలించాలట. నీటి విధానం వాయువ్య దిశగా ఉంటే వ్యక్తిగతంగా చాలా ప్రయోజనం ఉంటుందట.

పసుపునకు కేవలం వైద్యం, వంటల పరంగానే కాదు, ఆధ్యాత్మికంగానూ ఎంతో ప్రాధాన్యత ఉంది. హిందూ పూజలు, వివాహాల్లో ఇది ప్రధాన పాత్ర పోషిస్తుంది. పసుపు రాసిన తర్వాతే పెళ్లి పత్రికలు పంచుతారు. ఆలయాల్లోని దేవుడి విగ్రహాలకు కూడా దీన్ని అలంకరిస్తారు. అలాగే విష్ణువుకు ఇది ఎంతో ప్రీతికరమైంది.