శబరిమలలో అడుగుపెట్టి గెలిచా: విలేకరి కవిత

శబరిమల సాంప్రదాయాలను సవాల్ చేస్తూ.. ఆలయ ప్రవేశానికి సిద్ధమైన హైదరాబాద్ పాత్రికేయురాలు కవిత భక్తుల ఆందోళనలతో వెనుతిరగక తప్పలేదు. నిలక్కల్ బేస్ క్యాంప్‌తో కలిసి శబరిమల కొండపైకి వెళ్లిన కవిత జక్కల్, మరో సామాజిక కార్యకర్త శుక్రవారం దాదాపు సన్నిధానం దాటి దాదాపు శబరిమల ఆలయాన్ని సమీపించారు.

ఆలయానికి కొద్ది దూరంలో ఉన్న 18 మెట్ల వద్దకు చేరగానే మానవహారంగా ఏర్పడిన భక్తులంతా వారిని అడ్డుకున్నారు. ముఖ్యంగా వృద్ధులు, చిన్నారులు భారీ సంఖ్యలో ఆందోళనకు దిగారు. ఆలయ తలుపులు మూసివేస్తామని ప్రధాన పూజారి హెచ్చరించారు. ఈ నేపథ్యంలో బలవంతంగా ఆలయ ప్రవేశం చేయలేమని కేరళ పోలీసులు వెల్లడించడంతో ముగ్గురు మహిళలు వెనుతిరగక తప్పలేదు.

ఈ సందర్భంగా పాత్రికేయురాలు కవిత మాట్లాడుతూ.. అయ్యప్ప కొండపైకి రావడం చాలా సంతోషంగా, గర్వంగా ఉందని తెలిపారు. ఈ రోజు ఎంతో ప్రమాదకర పరిస్థితి ఎదుర్కొన్నానని, ఆలయానికి 100 మీటర్ల దూరంలోనే ఆగిపోయామన్నారు. వృద్ధులు, చిన్న పిల్లలు అడ్డుకోవడం వల్ల వెనక్కి వచ్చేశానన్నారు. కొండపైకి వెళ్లి విజయం సాధించానని తాను గర్వంగా చెప్పగలనని తెలిపారు. మరికొద్ది రోజుల్లో మళ్లీ శబరిమలకు వస్తానన్నారు.