తెరుచుకోనున్న శబరిమల ఆలయం.. మరోసారి ఉత్కంఠ!

మకరు విలక్కు పూజల అనంతరం జనవరి 20న మూసివేసిన అయ్యప్ప ఆలయ ద్వారాలు మంగళవారం సాయంత్రం తెరుచుకోనున్నాయి. కుంభ మాస పూజల కోసం సన్నిధానాన్ని ఐదు రోజుల పాటు తెరచి ఉంచుతారు. అయితే, శబరిమల ఆలయంలోకి అన్ని వయసుల మహిళలకు ప్రవేశం కల్పించాలని గతేడాది సెప్టెంబరులో సుప్రీంకోర్టు తీర్పు అనంతరం అక్టోబరులో సన్నిధానం తెరుచుకోగా తీవ్ర ఉద్రిక్తతలు చోటుచేసుకున్నాయి. ఇవి మండల, మకరు విలక్కు పూజల సమయంలోనూ కొనసాగాయి. అయితే, నాటి సంఘటనలు పునరావృతం కాకూడదని అధికారులు భావిస్తున్నారు. దీంతో, శబరిమల పరిసర ప్రాంతాల్లోని నిలక్కల్, పంబ, సన్నిధానంలో మంగళవారం సాయంత్రం నుంచి ఫిబ్రవరి 17 వరకు 144 సెక్షన్ అమలు చేయడానికి అనుమతించాలని పత్తనంతిట్టా కలెక్టర్‌ను జిల్లా ఎస్పీ కోరారు.

సుప్రీంకోర్టు తీర్పు అనంతరం తులమాస పూజల కోసం ఆయ్యప్ప ఆలయాన్ని తెరవగా, అవాంఛనీయ ఘటనలు చోటుచేసుకున్నాయని, పలు హిందూ సంస్థలు ఆందోళనలు, నిరసనలతో ఉద్రిక్తతలు తలెత్తాయి.. దీంతో భక్తులకు ఎలాంటి ఇబ్బందీ లేకుండా ఉండేందుకు 144 సెక్షన్ అమలు చేస్తున్నట్టు అధికారులు ఓ ప్రకటన వెలువరించారు. గత కొద్ది నెలలుగా చోటుచేసుకున్న పరిణామాలను దృష్టిలో ఉంచుకుని భద్రతను మరింత కట్టుదిట్టం చేశారు. భక్తులు, మీడియాను ఉదయం 10 గంటల తర్వాతే నిలక్కల్ బేస్ క్యాంప్‌ నుంచి పంబకు అనుమతిస్తారు.

ప్రధాన పూజారి వాసుదేవన్ నంబూద్రీ ఆధ్వర్యంలో ఆలయాన్ని తెరచి, ఐదు రోజుల పాటు కలషాభిషేకం, సహస్రకలషం, లక్షార్చణ లాంటి వివిధ రకాల విశేష పూజలను నిర్వహిస్తారు. మరోవైపు, అన్ని వయసుల మహిళలను అనుమతించాలన్న తీర్పును సవాల్ చేస్తూ సుప్రీంలో దాఖలైన పిటిషన్లపై ఇప్పటికే విచారణ పూర్తయింది. అయితే, తీర్పును మాత్రం రిజర్వులో ఉంచింది. నిషేధిత వయసు మహిళలను ఆలయంలోకి అనుమతించే విషయంలో ట్రావెన్‌కోర్ దేవస్వామ్ బోర్డు తన వైఖరి మార్చుకున్న విషయం తెలిసిందే. అయ్యప్ప అందరివాడని, ఎవరైనా దర్శించుకోవచ్చని సుప్రీంకోర్టుకు తెలిపింది. కాగా, మరోసారి శబరిమల వివాదాన్ని రాజకీయ లబ్దికి వినియోగించుకోవాలనే ఉద్దేశంతో బీజేపీ, కాంగ్రెస్ సహా వివిధ పార్టీలు ఉన్నాయి.