Sabarimala: పోలీసుల అరెస్ట్‌లు.. కేరళలో బంద్

మండల పూజలకు శనివారం సాయంత్రం తెరుచుకున్న శబరిమల ఆలయ పరిసరాల్లో మరోసారి ఘర్షణ వాతావరణం నెలకుంది. తాజాగా, సంఘ్ పరివార్‌కు చెందిన సీనియర్ మహిళా నేతను అరెస్ట్ చేయడంతో శబరిమల కర్మ సమితి, పలు హిందూ సంఘాలు శనివారం కేరళ బంద్‌కు పిలుపునిచ్చాయి. శనివారం తెల్లవారుజామున 2.30 గంటల ప్రాంతంలో హిందూ ఐక్యవేది రాష్ట్ర అధ్యక్షురాలు కేపీ శశికళను పోలీసులు అరెస్ట్‌ చేయడాన్ని నిరసిస్తూ హిందూ సంస్థలు ఆందోళనకు దిగాయి. 50ఏళ్లు దాటిన శశికళ ఇరుముడితో అయ్యప్ప దర్శనానికి వెళ్తుండగా పోలీసులు అడ్డుకున్నారని వీహెచ్‌పీ రాష్ట్ర అధ్యక్షుడు ఎస్‌జేఆర్‌ కుమార్‌ ఆరోపించారు. మరోవైపు, కేరళ ప్రభుత్వం శబరిమల ఆలయాన్ని నాశనం చేయాలని భావిస్తోందని వీహెచ్‌పీ నేత కుమార్‌ ఆగ్రహం వ్యక్తం చేశారు. బంద్‌ కారణంగా అత్యవసర సేవలు, శబరిమల వెళ్లే భక్తుల వాహనాలకు ఎలాంటి ఇబ్బంది కలిగించబోమని ఆయన పేర్కొన్నారు.

దాదాపు 15 వేల పోలీసుల భద్రత నడుమ శనివారం సాయంత్రం తెరుచుకున్న శబరిమల ఆలయంలోకి 50ఏళ్లలోపు మహిళలు ప్రవేశించకుండా భక్తులు ఆందోళనలు చేస్తున్నారు. ఆలయం వద్ద పోలీసుల భద్రత చాలా ఎక్కువగా ఉందని, కర్ఫ్యూ విధించారని, పూజలు కూడా చేసుకోనివ్వడం లేదని భక్తులు ఆరోపిస్తున్నారు. శబరిమల ఆలయ దర్శనం కోసం శుక్రవారం ఉదయం కొచ్చి చేరుకున్న సామాజిక కార్యకర్త తృప్తిదేశాయ్‌ను భక్తులు విమానాశ్రయంలోనే అడ్డుకోవడంతో ఆమె సుమారు 14 గంటలు అక్కడే ఉండిపోయారు. తృప్తిదేశాయ్‌ తమ గుండెలు మీదుగా వెళ్లాలని, చప్పట్లు కొడుతూ, శరణుఘోషతో భక్తులు నిరసన తెలపడంతో ఆమె చేసేదిలేక ముంబయికి తిరిగి వెళ్లిపోయారు.

ఈ నేపథ్యంలో ఆమెను అడ్డుకున్న దాదాపు 500మంది ఆందోళనకారులను పోలీసులు అరెస్ట్‌ చేశారు. మరోవైపు, శనివారం తెల్లవారుజామున ముంబయి చేరుకున్న తృప్తికి అక్కడ కూడా నిరసన సెగలు తగిలాయి. ఆందోళనల కారణంగా తృప్తి, ఆమె వెంట ఉన్న మరో ఆరుగురు మహిళలు ముంబయి విమానాశ్రయం వెలుపలకు రాలేకపోయారు. దీంతో సీఐఎస్‌ఎఫ్‌, ముంబయి పోలీసుల భద్రతతో ఆమె అక్కడి నుంచి బయటపడ్డారు.