Sabariamal: శబరిమలకు 90 ప్రత్యేక రైళ్లు.. నేటి నుంచే రిజర్వేషన్

కార్తీకమాసం, ధనుర్మాసం, సంక్రాంతి రద్దీ దృష్ట్యా ప్రత్యేక రైళ్లను నడపాలని దక్షిణ మధ్య రైల్వే నిర్ణయించింది. ముఖ్యంగా పుణ్యక్షేత్రాలకు వెళ్లే శబరిమల యాత్రీకుల సౌకర్యార్ధం డిసెంబర్‌ 9 నుంచి జనవరి 18 వరకు 90 వరకు ప్రత్యేక రైళ్లు నడపనున్నుట్లు గురువారం ప్రకటించింది. ఈ రైళ్లకు నవంబర్‌ 24 నుంచి రిజర్వేషన్‌ చేసుకునే అవకాశం ఉన్నట్టు అధికారులు తెలిపారు. ఈ ప్రత్యేక రైళ్లలో హైదరాబాద్‌-కొల్లం-హైదరాబాద్‌ వయా కాజీపేట, విజయవాడ, గూడూరు, రేణిగుంట, మెల్‌పక్కం మీదుగా 15 రైళ్లు, వయా వికారాబాద్‌, రాయచూర్‌, గుంతకల్‌, రేణిగుంట, మెల్‌పక్కం మీదుగా 16, వయా నడికుడి, గుంటూరు, గూడూరు, రేణిగుంట, మెల్‌పక్కం మీదుగా 6, నిజామాబాద్‌-కొల్లం-నిజామాబాద్‌ 5, కరీంనగర్‌-కొల్లం 1, కాచిగూడ-కొల్లం-కాచిగూడ 2, సిర్పూర్‌ కాగజ్‌నగర్‌-కొల్లం 1, కాకినాడ-కొల్లం-కాకినాడ 28, నర్సాపూర్‌-కొల్లం-నర్సాపూర్‌ 2, మచిలీపట్నం-కొల్లం-మచిలీపట్నం వయా గుంటూరు, రేణిగుంట, మెల్‌పక్కం మీదుగా 4, వయా గుంటూరు, తిరుపతి, కాట్‌పాడి మీదుగా 2, విజయవాడ-కొల్లం-విజయవాడ 2, అకోలా-కొల్లం 1, ఆదిలాబాద్‌-కొల్లం 1, కొల్లం-తిరుపతి 2, తిరుపతి-అకోలా 1, తిరుపతి-ఆదిలాబాద్‌ 1 చొప్పున ప్రత్యేక రైళ్లు నడపనున్నారు.

హైదరాబాద్-కొల్లాం సువిధ ప్రత్యేక రైలు (82721) నవంబర్ 25, 29న సాయంత్రం 3.55 గంటలకు హైదరాబాద్‌లో బయల్దేరి మర్నాడు ఉదయం 11.55 గంటలకు కొల్లాం చేరుకుంటుంది. కొల్లాం-హైదరాబాద్ సువిధ ప్రత్యేక రైలు (82722) నవంబర్ 27, డిసెంబర్ 1న కొల్లాం నుంచి 3 గంటలకు బయల్దేరి మర్నాడు ఉదయం 10030 గంటలకు హైదరాబాద్ చేరుకుంటుంది. డిసెంబర్ 3, 5, 10, 12, 17, 19, 24, 26, 31, జనవరి 2, 7, 9, 14న చెన్నై సెంట్రల్ నుంచి రాత్రి 8.40 గంటలకు బయలుదేరే ప్రత్యేక రైలు, మర్నాడు మధ్యాహ్నం కొల్లాం చేరుకుంటుంది. డిసెంబర్ 4, 6, 11, 13, 18, 20, 27, జనవరి 3, 8, 10న కొల్లాం నుంచి మధ్యాహ్నం 3 గంటలకు బయల్దేరి, మర్నాడు ఉదయం 9.45 గంటలకు చెన్నై సెంట్రల్‌కు వస్తుంది.