శబరిమలలో ప్రత్యేక మండల పూజ.. ఆలయం మూసివేత

హరిహర క్షేత్రం శబరిమల ఆలయాన్ని ఏడాదిలో కొన్ని రోజుల మాత్రమే తెరచి ఉంచుతారు. నవంబరు మధ్యలో తెరచి జనవరి మూడో వారంలో ఆలయాన్ని మూసేస్తారు. ఈ సమయంలోనే మండల పూజ, మకరు విలక్కు నిర్వహిస్తారు. ఈ రెండు శబరిమల ఆలయంలో జరిగే పెద్ద ఉత్సవాలు. నవంబరులో ఆలయం తెరచిన 41 రోజుల పాటు మండల పూజలు సాగుతాయి. 41 వ రోజు నాడు ప్రత్యేక మండల పూజను నిర్వహించి, అదే రోజు స్వామివారి ఆలయాన్ని తాత్కాలికంగా మూసివేస్తారు. మళయాలం క్యాలెండర్‌ను అనుసరించి ధనుర్మాసంలోని 11 లేదా 12 రోజును వృశ్చికం నెలగా తొలి రోజుగా పరిగణిస్తారు. ఆ రోజునే ప్రత్యేక మండల పూజ నిర్వహిస్తారు. శబరిమలలో మంగళవారం నాడు స్వామివారికి ప్రత్యేక మండల పూజను నిర్వహించారు.

అయ్యప్ప స్వామికి ప్రత్యేకంగా చేయించిన బంగారు ఆభరణాన్ని అలంకరిస్తారు. ఉదయం 11 గంటలకు మండల పూజ ఆరంభమైందిది. ఈ ప్రత్యేక ఆభరణాన్ని ట్రావెన్‌కోర్ రాజవంశానికి చెందిన చిత్తర్ తిరునాళ్ బలరామ వర్మ 420 బంగారు నాణేలతో 1973లో తయారుచేయించారు. అప్పటి నుంచి ఈ ఆభరణంతో స్వామివారికి ఏటా మండల పూజను అట్టహాసంగా నిర్వహిస్తున్నారు. మూడు రోజుల పాటు ఆలయాన్ని మూసి, మకర జ్యోతి ఉత్సవాలకు డిసెంబర్‌ 30న మళ్లీ తెరుస్తారు. జనవరి 14న మకర విలుక్కు కార్యక్రమాన్ని నిర్వహించి, మరో వారం తర్వాత పడిపూజతో ఉత్సవాలు ముగుస్తాయి. మళ్లీ ఆలయాన్ని మూసివేస్తారు. మకర జ్యోతికి పెద్దపాదం మార్గం తెరుచుకుంటుంది. ఎరుమేలి నుంచి పెద్దపాదం మీదుగా శబరిమలకు భక్తులు చేరుకుంటారు. దట్టమైన అడవులు, ఎత్తైన కొండలను దాటుకుంటూ శబరిగిరికి చేరుకుంటారు.

ప్రత్యేక మండల పూజ రోజునే గురువాయూర్‌లోని శ్రీకృష్ణ ఆలయంలోనూ ప్రత్యేక అభిషేకం నిర్వహిస్తారు. ఈ అభిషేకానికి భక్తులు విశేషంగా హజరవుతారు.