అద్భుత వీడియో: అయ్యప్ప సన్నిధిలో ఏసుదాసు ‘హరివరాసనం’

శబరిమల అయ్యప్ప స్వామి ప్రపంచవ్యాప్తంగా ఎంత పాపులరో.. ఆ స్వామిపై ఏసుదాసు పాడిన పాటలు కూడా అంతే పాపులర్ అయ్యాయి. అయ్యప్ప పాటలు అంటే ఠక్కున్న గుర్తొచ్చేది మన సంగీత నేపథ్య గాయకుడు ఏసుదాసే. అంతెందుకు.. ఏసుదాసు పాట అంటే.. అయ్యప్ప స్వామికి కూడా ఇష్టమే కాబోలు. శబరిమల ఆలయంలో స్వామివారికి రోజూ పవళింపు సేవ సమయంలో ఈ మహా గాయకుడు పాడిన జోలపాటనే ఆలపిస్తారు. స్వామివారి పవళింపు సేవ వేళ పాడే ‘హరివరాసనం’ పాట ఎంత గుర్తింపు పొందిందో ప్రత్యేకంగా చెప్పక్కర్లేదు. అయ్యప్ప దీక్ష తీసుకునే ప్రతి భక్తుడి సెల్‌ఫోన్లో ఈ పాట తప్పకుండా ఉంటుంది. మరి అంతటి ప్రాశస్త్యం పొందిన పాటను స్వామివారి సన్నిధిలో స్వయంగా ఏసుదాసే ఆలపిస్తే..! అది నిజంగా అపూర్వ ఘట్టమే.

అనేక వివాదాల మధ్య 2016 సెప్టెంబర్‌లో శబరిమల కొండకు చేరుకున్న ఏసుదాసు.. స్వామి సన్నిధికి చేరగానే భక్తి పారవశ్యంతో పొంగిపోయారు. ఆ ఆనందంలో ‘హరివరాసనం’ అష్టకాన్ని అందుకున్నారు. వెంట ఉన్న అయ్యప్ప మాలధారులు కూడా ఆయనతో గొంతు కలిపారు. ఇంకేం.. అదో మహాద్భుత ఘట్టంగా మారింది.

భక్తుల్లో కొందరు ఆ అరుదైన సందర్భాన్ని తమ సెల్‌ఫోన్లలో బంధించారు. ఆ వీడియో సోషల్ మీడియాలో వైరల్‌గా మారింది. దక్షిణాది రాష్ట్రాల్లో నేటికీ చక్కర్లు కొడుతూనే ఉంది. 2017లో అత్యధిక మంది వీక్షించిన వీడియోల్లో ఒకటిగా నిలిచింది. అలాంటి అపురూపమైన వీడియో ‘సమయం’ పాఠకుల కోసం..