ఇరుముడి ధరిస్తేనే పదునెట్టాంబడి ఎక్కడానికి అర్హులా?

శబరిమలలో కొలువుదీరిన అయ్యప్పస్వామిని హరిహరసుతుడిగా భావిస్తారు. మహిషి సంహారం కోసం ధర్మశాస్తాగా అవతరించిన హరిహరసుతుడు శబరిగిరుల్లో అయ్యప్పగా పూజలందుకుంటున్నాడు. స్వామి దర్శనం కోసం వచ్చే భక్తులు మాలధారణ చేసి 41 రోజుల పాటు నిష్టగా దీక్ష చేస్తారు. ఆతర్వాత ఇరుమడితో వచ్చి పదునెట్టాంబడి అధిరోహిస్తారు. కేవలం 41 రోజులు మాలధరించి ఇరుముడి కట్టుకున్న వారికి మాత్రమే పదునెట్టాంబడి ఎక్కే అర్హత ఉంటుంది. సాధారణ భక్తులు మాత్రం మెట్లను ఎక్కడానికి అర్హులు కారు.

పదునెట్టాంబడిలోని ఒక్కో మెట్టుకు ఒక్కో అదిష్టాన దేవత ఉంటుంది. సన్నిధానానికి, 18 మెట్లకు నమస్కరిస్తూ స్తోత్రాలు పఠిస్తూ మెట్లను ఎక్కుతారు. ఆలయంలో స్వామి కొలువైన సందర్భంగా 18 వాయిద్యాలను మ్రోగించారట.

ఈ మెట్లు 18 పరిపూర్ణతలను సాధించిన ఙ్ఞానానికి సంకేతం. ఆ ఙ్ఞానసాధనే 18 మెట్లు ఎక్కడం. ఇవి పంచలోహాల పూతతో కప్పబడి ఉంటాయి.
పరుశరాముడు నిర్మించిన వీటిపై నుంచే స్వామి ఆలయంలోకి ప్రవేశించారని, అందుకే అత్యంత పవిత్రమైందని నమ్మకం. ఎవరైతే పదునెట్టాంబడిని 18 సార్లు ఎక్కుతారో వాళ్లు శబరిమలలో ఒక కొబ్బరి మొక్కని నాటుతారు.

మొదటి ఎనిమిది మెట్లు - అరిషడ్వర్గాలు, రాగద్వేషాలను సూచిస్తాయి - కామం, క్రోధం, లోభం, మోహం, మదం, మాత్సర్యం, దంబం, అహంకారం.
తదుపరి ఐదు మెట్లు పంచేంద్రియాలను సూచిస్తాయి - కళ్లు, చెవులు, నాసిక, జిహ్వ, స్పర్శ.
తదుపరి మూడు మెట్లు మూడు గుణాలను సూచిస్తాయి - సత్వం, తామసం, రాజసం.
చివరి 2 మెట్లు - విద్య, అవిద్యలను సూచిస్తాయి.

పురాణాల ప్రకారం '18' సంఖ్యకు గొప్ప ప్రాధాన్యత ఉంది. అయ్యప్ప 18 ఆయుధాలతో చెడును నిర్మూలిస్తాడు. ఆ 18 మెట్లు 18 ఆయుధాలను సూచిస్తాయి.

భగవద్గీత, మహాభారతం, చతుర్వేదాలలో 18 అధ్యాయాలు ఉన్నాయి. 18 పురాణాలు, ఉపపురాణాలు ఉన్నాయి. మహాభారత యుద్దం, రావణసంహారం 18 రోజులు జరిగింది.

అయ్యప్ప సన్నిధానం 18 గొప్ప పర్వతాల మధ్య ఉంది. అవి పొన్నంబలమేడు, గౌడెన్మల, నాగమల, సుందరమల, చిట్టంబలమల, ఖల్గిమల, తంగమల, మ్యద్లుంల, శ్రీపాదమల, దేవర్మల, నిలక్కల్, తలప్పరమల, నీలిమల, కరిమల, పుదుసేర్య్మల, కలకెట్టిమల, ఇంచిప్పరమల, శబరిమల.

ఎవరైతే నియమ నిష్టలతో సేవించి "పదునేట్టాంపడి " నెక్కి దర్శిస్తారో వారికి ఆయురారోగ్య అష్టఐశ్వ ర్యాలను ప్రసాదిస్తాడని నమ్మకం. మాటలు రాని వారికి మాటలు వచ్చే మహిమాన్వితమైన ప్రదేశమిది.