ఆ హిట్టర్ లేకపోవడంతోనే కోల్‌కతా ఓటమి

ఐపీఎల్ పదో సీజన్‌లో సొంతగడ్డపైనే పుణె చేతిలో అనూహ్యంగా కోల్‌కతా నైట్‌రైడర్స్ ఓటమి చవిచూసింది. ఈడెన్‌ గార్డెన్స్‌లో బుధవారం రాత్రి జరిగిన మ్యాచ్‌లో 156 పరుగుల లక్ష్యాన్ని పుణె మరో నాలుగు బంతులు మిగిలి ఉండగానే ఛేదించి 4 వికెట్ల తేడాతో విజయాన్ని అందుకుంది. ఆదిలోనే వికెట్లు చేజార్చుకోవడం.. గాయం కారణంగా హిట్టర్ ఉతప్ప మ్యాచ్‌కి దూరమవడం కోల్‌కతాని దెబ్బతీసిందని ఆ జట్టు బౌలర్ క్రిస్ వోక్స్ అభిప్రాయపడ్డాడు. తాజా సీజన్‌లో తొమ్మిది మ్యాచ్‌లాడిన ఉతప్ప 5 అర్ధశతకాలు బాది 384 పరుగులతో అత్యధిక పరుగులు చేసిన బ్యాట్స్‌మెన్ జాబితాలో మూడో స్థానంలో కొనసాగుతున్నాడు.

‘పుణెతో మ్యాచ్‌కి ఫామ్‌లో ఉన్న ఉతప్ప దూరమవడం జట్టుని దెబ్బతీసింది. అతను సీజన్‌లో మెరుగ్గా రాణిస్తున్నాడు. అయితే గాయం కారణంగా అతనికి విశ్రాంతినివ్వక తప్పలేదు. కానీ.. తర్వాత మ్యాచ్‌లో ఉతప్ప మళ్లీ మైదానంలోకి దిగుతాడని ఆశిస్తున్నా. పవర్‌ ప్లేలోనే మేము మూడు కీలక వికెట్లు చేజార్చుకున్నాం. మధ్యలో ఆ నష్టాన్ని భర్తీ చేసేందుకు ప్రయత్నించినా లాభం లేకపోయింది. టీ20ల్లో ఉండే సమస్యే ఇది. ఆరంభంలోనే వికెట్లు చేజార్చుకుంటే మెరుగైన రన్‌రేట్ సాధించలేము. మేము ఆశించిన స్కోరు కంటే 15-20 పరుగులు తక్కువ చేశాం. 156 స్వల్ప లక్ష్యాన్ని ఈడెన్ లాంటి పిచ్‌పై కాపాడాలంటే కష్టమే’ అని క్రిస్‌ వోక్స్ వివరించాడు. ఛేదనలో ఓపెనర్ రాహుల్ త్రిపాఠి (93: 52 బంతుల్లో 9x4, 7x6) మెరుపు ఇన్నింగ్స్‌తో పుణెని గెలిపించాడు.