అది చిట్టి రోబో.. ఇది చింటు రోబో!

శంకర్, రజనీకాంత్ కాంబినేషన్‌లో వచ్చిన ‘రోబో’ సినిమా గుర్తుందిగా.. అందులో ‘చిట్టి’ పేరుతో హ్యూమనాయిడ్ రోబోను సినిమాటిక్‌గా మనకు చూపించారు. ఈ చిట్టి మనషులు చేసినట్లే అన్ని పనులు చేసేస్తుంది. మనతో మాట్లాడుతుంది.. మనం చెప్పేది అర్థం చేసుకుంటుంది. అయితే అది సినిమా ఏమైనా చెయ్యొచ్చు, ఎలాగైనా చూపించొచ్చు. కానీ అలాంటి హ్యుమనాయిడ్ రోబోనే తయారుచేసి సత్తా చాటారు పుణేలోని మహారాష్ట్ర ఇన్‌స్టిట్యూట్ ఆఫ్ టెక్నాలజీ (ఎంఐటీ) విద్యార్థులు. దీని పేరు ‘చింటు’.

చిట్టి చేసినన్ని పనులు ఇది చేయలేకపోయినా.. మనతో మాట్లాడటం, వార్తా పత్రికలు, పుస్తకాల్లో ఉన్న అక్షరాలను చదవడం, వివిధ దేశాల రాజధానుల పేర్లు చెప్పడం, షారుఖ్ ఖాన్‌ను ఇమిటేట్ చేయడం, గంగనం డాన్స్ లాంటివి చేస్తూ ఆశ్చర్యపరుస్తోంది. తన యజమాని మందులు ఏ సమయంలో వేసుకోవాలో కూడా అలారం ద్వారా గుర్తుచేస్తుంది ఈ చింటు. కాగా, ప్రముఖ టెక్ సంస్థ ఐబీఎంకు చెందిన వాట్సన్ టూల్‌తో ఈ రెండు కాళ్ల హ్యూమనాయిడ్ రోబోను ఎంఐటీ విద్యార్థులు తయారుచేశారు.

ఇంజినీరింగ్ ఫైనల్ ఇయర్ విద్యార్థుల ప్రాజెక్టు వర్కులో భాగంగా తయారుచేసిన ఈ రోబోను కాలేజీ వార్షిక టెక్నికల్ ఫెస్ట్ ‘టెక్సిఫైర్’‌లో ప్రదర్శించారు. ఈ ఏడాది జనవరిలో ప్రారంభించిన ఈ ప్రాజెక్టును విద్యార్థులు మూడు నెలలలోపే పూర్తిచేశారు. ఇన్‌బిల్ట్ కెమెరా, మైక్రోఫోన్‌తో వచ్చే ఐబీఎంకు చెందిన కాగ్నిటివ్ కంప్యూటింగ్ టూల్ ‘వాట్సన్’ను ఈ రోబోకి అమర్చారు. ఈ ప్రాజెక్టు కోసం ఐబీఎం ఇండియా రూ. 10 లక్షల గ్రాంట్ కూడా ఇచ్చింది. ఫ్రెంచ్ కంపెనీ ‘అల్డెబరన్’ సహాయంతో ఈ రోబోను తయారుచేశారు.