చెలరేగిన పుణె బౌలర్లు.. గుజరాత్ 161 ఆలౌట్

ఐపీఎల్ పదో సీజన్‌లో భాగంగా రైజింగ్ పుణె సూపర్ జెయింట్‌తో జరుగుతున్న మ్యాచ్‌లో తొలుత బ్యాటింగ్ చేసిన గుజరాత్ లయన్స్ 19.5 ఓవర్లలో 161 పరుగులకే ఆలౌటైంది. ఓపెనర్లు మెక్‌కలమ్ (45: 27 బంతుల్లో 5x4, 2x6), ఇషాన్ కిషన్ (31: 24 బంతుల్లో 3x4, 2x6) మెరుపులు మెరిపించడంతో భారీ స్కోరు సాధించేలా కనిపించిన గుజరాత్ మధ్య ఓవర్లలో తడబడింది. ఇమ్రాన్ తాహిర్ వరుస బంతుల్లో అరోన్ ఫించ్ (13), డ్వేన్ స్మిత్ (0)ని ఔట్ చేసి ఆ జట్టును కోలుకోలేని దెబ్బతీశాడు. కెప్టెన్ సురేశ్ రైనా (8) లేని పరుగు కోసం ప్రయత్నించి రనౌట్‌గా వెనుదిరిగడంతో గుజరాత్ కష్టాలు రెట్టింపయ్యాయి. చివర్లో దినేశ్ కార్తీక్ (29: 26 బంతుల్లో 3x4) ఒక ఎండ్‌లో నిలబడి జట్టును ఆదుకునేందుకు తీవ్రంగా ప్రయత్నించినా అతనికి సహకారం లభించలేదు. జడేజా (19), ఫాల్కనర్ (6) కీలక సమయంలో వికెట్ చేజార్చుకున్నారు. పుణె బౌలర్లలో తాహిర్ , ఉనద్కత్ చెరో మూడు వికెట్లు తీయగా.. శార్ధూల్, క్రిస్టియాన్ తలో వికెట్ తీశారు. రైనాతో పాటు దినేశ్ కార్తీక్ రనౌట్ రూపంలో వెనుదిరిగారు.