ప్రామిస్ చేయించుకుని ఫొటోకి సచిన్ పర్మిషన్

భారత క్రికెట్ దిగ్గజం సచిన్ తెందుల్కర్‌కి ఉన్న క్రేజ్ గురించి అందరికీ తెలుసు. అతను క్రికెట్‌కి దూరమైనా.. అభిమానుల్లో మాత్రం ఈ దిగ్గజానికి ఉన్న ఆదరణ ఇసుమంతైనా తగ్గలేదు. ఇప్పటికీ అతను ఎక్కడ కనబడినా ఫొటోలు, ఆటోగ్రాఫ్‌లంటూ జనం ఎగబడిపోతుంటారు. తాజాగా సచిన్ తెందుల్కర్ కారులో వెళ్తూ సిగ్నల్ దగ్గర ఆగాడు. అతని పక్కన ఓ స్కూటర్‌పై వచ్చిన ఇద్దరు యువకులు సచిన్‌‌తో కలిసి సెల్ఫీ దిగేందుకు ప్రయత్నించారు. అయితే వారు హెల్మ్‌ట్ లేకుండానే స్కూటర్‌పై ప్రయాణిస్తుండటంతో సున్నితంగా హెచ్చరించాడు. అనంతరం ఫొటోకి పోజు ఇచ్చి ఇక నుంచి తప్పకుండా హెల్మెట్ ధరించాలంటూ యువకులతో ప్రామిస్ చేయించుకున్నాడు. ఆ సమయంలోనే వారి పక్కనే బైక్‌పై వచ్చిన ఓ దంపతులకి కూడా సచిన్ ఇదే సూచన చేయడం విశేషం. ప్రస్తుతం ఈ వీడియో సోషల్ మీడియాలో హల్‌చల్ చేస్తోంది. ప్రస్తుత ఐపీఎల్ సీజన్‌లో కూడా ముంబయి ఇండియన్స్ జట్టుకి సచిన్ మెంటార్‌గా వ్యవహరిస్తున్న విషయం తెలిసిందే.