20 సిక్సర్లలో స్టేడియం పైకప్పు తాకినవి..?

ఇండోర్ వేదికగా రాయల్ ఛాలెంజర్స్ బెంగళూరు, కింగ్స్ ఎలెవన్ పంజాబ్ జట్ల మధ్య జరిగిన ఐపీఎల్ మ్యా‌చ్‌లో తక్కువ స్కోర్లు నమోదైనా.. అభిమానులు బౌండరీల వర్షంలో తడిసి ముద్దయ్యారు. ఈ మ్యాచ్‌లో బెంగళూరు బ్యాట్స్‌మెన్లు 6 ఫోర్లు, 11 సిక్సర్లు బాదగా.. పంజాబ్ హిట్టర్లు 11 ఫోర్లు, 9 సిక్సర్లను కొట్టారు. టాస్ గెలిచి తొలుత బ్యాటింగ్ చేసిన బెంగళూరు జట్టు హిట్టర్ ఏబీ డివిలియర్స్ (89 నాటౌట్ : 46 బంతుల్లో 3x4, 9x6) సిక్సర్ల సునామీతో 4 వికెట్ల నష్టానికి 148 పరుగులు చేసింది. ఆ జట్టులో ఏబీ మినహా అందరు బ్యాట్స్‌మెన్లు తేలిపోయారు. లక్ష్య ఛేదనలో హసీమ్ ఆమ్లా (58 నాటౌట్: 38 బంతుల్లో 4x4, 3x6), మాక్స్‌వెల్ (43 నాటౌట్: 22 బంతుల్లో 3x4, 4x6) దూకుడుగా ఆడటంతో పంజాబ్ 14.3 ఓవర్లలోనే 150/2తో అలవోక విజయాన్ని అందుకుంది.

VIDEO: The @ABdeVilliers17 show… Sit back and enjoy Mr.360 at work. https://t.co/5g7XN2H2uE @RCBTweets #IPL #KXIPvRCB — IndianPremierLeague (@IPL) April 10, 2017 బెంగళూరు ఇన్నింగ్స్‌లో ఏబీ డివిలియర్స్ ఒక ఎండ్‌లో ఒంటరిగా పోరాడుతున్నా.. అతనికి సహకరించే వారు లేకపోవడంతో ఆ జట్టు 15 ఓవర్లు ముగిసే సమయానికి 71/4తో తీవ్ర ఒత్తిడిలో ఉంది. ఈ దశలో 16వ ఓవర్ వేసిన వరుణ్ అరోన్ బౌలింగ్‌లో మొదలైన ఏబీ సిక్సర్ల విధ్వంసం.. ఆఖరి ఓవర్ చివరి బంతి వరకూ కొనసాగింది. బౌలర్ ఎవరనేదానితో సంబంధం లేకుండా చెలరేగిపోయిన డివిలియర్స్ తానాడిన చివరి 18 బంతుల్లో ఏకంగా 44 పరుగులు పిండుకున్నాడు. ఇందులో ఎనిమిది సిక్సర్లు ఉండటం అతని మెరుపు ఇన్నింగ్స్‌కి నిదర్శనం. ఏబీ దూకుడుతో చివరి నాలుగు ఓవర్లలోనే బెంగళూరు 68 పరుగులు రాబట్టగలిగింది. సందీప్ శర్మ బౌలింగ్‌లో ఓ బంతిని స్టేడియం పైకప్పు తాకేలా కొట్టిన డివిలియర్స్.. 20వ ఓవర్ వేసిన మోహిత్ శర్మ బౌలింగ్‌లో ఆఖరి బంతిని ఏకంగా స్టేడియం వెలుపలకి పంపించేశాడు. అయితే పంజాబ్ కెప్టెన్ మాక్స్‌వెల్ కూడా సిక్సర్లు బాదిన.. అవి స్టాండ్స్‌కే పరిమితమయ్యాయి.