వీడియో: హైవేపై బైక్ యాక్సిడెంట్.. పాప మిరాకిల్ ఎస్కేప్

కర్ణాటక: హైవే మీద జరిగిన బైక్ యాక్సిండెంట్ నుంచి ఓ చిన్నారి ఆశ్చర్యకరంగా బతికిపోయింది. తుమకూరు-బెంగళూరు హైవే మీద బైక్‌పై వెళ్తున్న దంపతులు.. నేలమంగళ సమీపంలోని అరషినకుంటే వద్ద ఓ స్కూటీని ఢీ కొట్టారు. వెనుక భాగం నుంచి వేగంగా వచ్చి ఢీకొనడంతో స్కూటీపై ఉన్న వ్యక్తితోపాటు బైక్ మీది నుంచి దంపతులిద్దరూ కింద పడిపోయారు. కానీ ముందు భాగంలో హ్యాండిల్ పట్టుకొని కూర్చున్న పాప అమూల్య మాత్రం అలాగే బైక్‌తోపాటు వెళ్లిపోయింది.

రోడ్డుకు ఎడమ వైపు యాక్సిడెంట్ కాగా.. ప్రమాదం తర్వాత అర కిలోమీటర్ దూరంలో కుడి వైపు డివైడర్ మీదున్న పచ్చిక మీద పాప పడిపోయింది. పాప డివైడర్ మీద పడిపోయిన విషయాన్ని గమనించిన తోటి వాహనదారులు రక్షించారు. పాపతోపాటు, ఆమె తల్లిదండ్రులు స్వల్ప గాయాలతో బయటపడ్డారు. ఈ యాక్సిడెంట్ వీడియో మొత్తం వెనుకే వస్తోన్న కారు డ్యాష్ కెమెరాలో రికార్డయ్యింది.