4వ అంతస్తు నుంచి కిందపడ్డా సేఫ్.. ఈ బుడతడు మృత్యుంజయుడు

నాలుగో అంతస్తు నుంచి కిందపడిపోతే బతికి బట్టకట్టడం సాధ్యమేనా. అనుమానమే లేదు.. ప్రాణాలు పోవడం ఖాయం.. కనీసం కాళ్లు, చేతులు విరిగి ఆస్పత్రిలో చేరడం పక్కా. కాని ముంబైలో మాత్రం ఓ మిరాకిల్ జరిగింది. ఏడాది వయసున్న ఓ బుడతడు నాలుగో అంతస్తు నుంచి కిందపడినా ప్రాణాలతో బయటపడ్డాడు. చిన్న గాయాలతో పెద్ద ప్రమాదం నుంచి తప్పించుకుని మృత్యుంజయుడయ్యాడు.

గోవండి ఏరియాలోని ఓ అపార్టుమెంట్‌లోని నాలుగో అంతస్తులో అజిత్ బార్కడే కుటుంబం నివాసం ఉంటోంది. గురువారం అజిత్ తల్లి ఇంటి బాల్కనీ కిటికీ తీసి.. తిరిగి మూసివేయడం మర్చిపోయింది. అదే సమయంలో ఏడాది వయసున్న అతడి కుమారుడు అథర్వ ఆడుకుంటూ కిటికీ వైపు వెళ్లాడు. సేఫ్టీ గ్రిల్ లేకపోవడంతో కిటికీలో నుంచి బయటకు తొంగి చూడబోగా.. ప్రమాదవశాత్తూ కిందకు పడిపోయాడు.

బాలుడు కిందపడిపోవడాన్ని గమనించిన తల్లిదండ్రులు పరుగున కిందకు వెళ్లారు. సరిగ్గా బాల్కనీ కింద చెట్టు ఉండడంతో దానిపై పడి.. బాలుడు నేలను తాకాడు. కంగారు పడిన తల్లిదండ్రులు పసివాడిని ఆస్పత్రికి తరలించారు. చిన్నారి పెదవికి, కాలికి స్వల్ప గాయమయ్యిందని.. అతడికి ఎలాంటి ప్రమాదం లేదని డాక్టర్లు చెప్పడంతో ఊపిరి పీల్చుకున్నారు. ఇంట్లో నుంచి బాల్కనీలోకి వెళ్లే తలుపు తెరిచి ఉండడంతో ఈ ప్రమాదం జరిగిందని తల్లిదండ్రులు చెబుతున్నారు.