అతడు 1.5 అడుగులు, ఆమె 5 అడుగులు కానీ..

పెళ్లిళ్లు స్వర్గంలోనే నిర్ణయించబడతాయంటారు. కర్ణాటకలో ఆదివారం మూడు ముళ్ల బంధంతో ఒక్కటైన ఓ జంట విషయంలో అదే నిజమైంది. గడగ్-సాంబపూర్ లోని మల్లజ ఆలయంలో 1.5 అడుగులున్న వరుడు మల్లప్ప...5 అడుగుల శకుంతల వేదమంత్రాల మధ్య వివాహ బంధంతో ఒక్కటయ్యారు. మల్లప్ప (50) పుట్టుకతోనే పోలియో, మరుగుజ్జుతనంతో పుట్టాడు. తల్లి కెంచమ్మ తన భుజాలపై మల్లప్పను మోస్తూ పెంచి పెద్ద చేసింది. మల్లప్ప రెండు కాళ్లు పనిచేయవు. చేతులపైనే పాకుతాడు.

తొంటద సిద్దలింగ స్వామిజీ ఆలయం సహకారంతో మల్లప్ప డిగ్రీ వరకు చదివాడు. అక్కడే గుమస్తాగా పనిచేస్తున్నాడు. ప్రస్తుతం మూడు చక్రాల బండి నడుపుతున్నాడు. తన కుటుంబాన్ని తాను పోషించే స్థాయికి ఎదిగాడు.

ఆలయ పెద్దల చొరవతో శకుంతల (38)తో మల్లప్పకు పెళ్లి చేశారు.

‘శకుంతల నాకు కొత్త జీవితాన్ని ప్రసాదించింది. ప్రతి ఒక్కరికి ఫీలింగ్స్ ఉంటాయి. వాటిని గౌరవించాలి. మాకేమీ ఆత్మన్యూనతా భావం లేదు’ అని అంటున్నాడు మల్లప్ప ఎంతో ఆత్మవిశ్వాసంతో.

అతని భార్య కూడా శకుంతల మల్లప్పను పెళ్లి చేసుకోవడం సంతోషంగా ఉందని చెబుతోంది.