వరుసగా మూడుసార్లు లాటరీలో 32 కోట్లు ప్రైజ్ మనీ!

మనం కొన్న టిక్కెట్‌కు ఒక్కసారైనా లాటరీ వరించకపోతుందా అని ఆశగా ఎదురుచూసేవాళ్లు ఎందరో ఉంటారు. లాటరీ అందుకోవాలంటే అదృష్టం ఉండాలి. దీనికి కూడా పెట్టిపుట్టాలి అంటారు. అలాంటి అదృష్టవంతులు నూటికో కోటికో ఒకరు ఉంటారు. కానీ అమెరికాకు చెందిన ఓ మహిళకు మాత్రం అదృష్టదేవత ఒకటి కాదు రెండు కాదు ఏకంగా మూడుసార్లు తలుపుతట్టింది. లాటరీ కోసం ఆశగా ఎదురుచూసే వారు అసూయ పడేలా వారం వ్యవధిలో ఏకంగా మూడుసార్లు కోట్ల రూపాయలు గెలుచుకుంది. వర్జీనియాకు చెందిన బ్రెండా జెంట్రీ అనే మహిళను లక్ష్మీదేవి వరించింది.

వర్జీనియా లాటరీ సంస్థ వెబ్‌సైట్‌ నిర్వహించిన లాటరీలో మొదటిసారి 5 వేలు డాలర్లు, రెండోసారి 500 డాలర్లు, మూడోసారి ఏకంగా మూడు 5 మిలియన్ డాలర్లు గెలుపొందింది. అంటే మన కరెన్సీలో వరుసగా రూ. 3,26,000, రూ.32,600, రూ.32 కోట్ల 59 లక్షలు. గెలుచుకున్న మొత్తాన్ని 30 ఏళ్లపాటు వాయిదా పద్దతిలో చెల్లించాలా లేదా ఒకేసారి తీసుకుంటారా అని విజేతను నిర్వాహకులు అడిగితే మొత్తం ఒకేసారి కావాలని కోరింది. అంత మొత్తం ఒకేసారి రావడంతో జెంట్రీ సంతోషానికి అవధుల్లేవు. దీంతో ఒకింత సంభ్రమాశ్చర్యాలకు గురైంది. తన ఆనందాన్ని మాటల్లో వ్యక్తపరచలేనని తెలిపింది. కోట్లు వచ్చినా తన జీవన శైలిలో మార్పు ఉండదని, గతంలో ఎలా ఉన్నానో భవిష్యత్తులో అలాగే ఉంటానని పేర్కొంది.