ఆయనకు 80, ఆమెకు 65.. లేటు వయస్సులో బిడ్డకు జననం!

అద్భుతం.. జమ్మూ కశ్మీర్‌లోని పూంచ్ జిల్లా ఆసుపత్రిలో 65 ఏళ్ల వృద్ధ మహిళ పండంటి ఆడ బిడ్డకు జన్మనిచ్చి సరికొత్త రికార్డు సృష్టించింది. లేటు వయస్సులో బిడ్డకు జన్మనివ్వడమనేది వైద్య చరిత్రలోనే చాలా అరుదైన ఘటన అని వైద్యులు తెలిపారు. పైగా, మహిళ భర్త హకీం దిన్ వయస్సు 80 ఏళ్లు కావడం మరో విశేషం.

దేశంలో సాధారణంగా మహిళల రుతుక్రమం 47 ఏళ్ల నుంచే మందగిస్తుందని, ఒక్కసారి రుతుక్రమం నిలిచిపోతే గర్భం దాల్చడానికి అవకాశం ఉండదని వైద్యులు తెలిపారు. హకీం, ఆయన భార్య(పేరు గోప్యంగా ఉంచారు)కు ఇప్పటికే పదేళ్ల కొడుకు ఉన్నాడు. రెండో కాన్పులో ఆడ బిడ్డకు జన్మనిచ్చారు.

ప్రపంచంలో లేటు వయస్సులో బిడ్డకు జన్మనిచ్చిన రికార్డు ఇప్పటివరకు స్పెయిన్‌కు చెందిన 66 ఏళ్ల మారియా డెల్ కార్మెన్ బౌసదా దెలారా పేరున ఉంది. అయితే, ఆమె ఐవీఎఫ్ విధానంలో గర్భం దాల్చింది. ఈ నేపథ్యంలో లేటు వయస్సులో సహజసిద్ధంగా బిడ్డకు జన్మనిచ్చిన మహిళగా హకీం భార్య ప్రపంచ రికార్డులో స్థానం పొందే అవకాశం ఉంది.