83 ఏళ్ల తాతకు 30 ఏళ్ల యువతికి పెళ్లైంది

వారసుడి కోసం ఓ వృద్ధుడి పోరాటం, ఆస్థి కోసం యువతి ఆరాటం ఆ ఇద్దరిని కలిపింది. దీంతో 83 ఏళ్ల వృద్ధుడికి 30 యువతికి పెళ్లైంది. ఈ పెళ్లికి చుట్టపక్కల 12 ఊర్ల నుంచి ఆహ్వానితులు కూడా వచ్చారు. ఘనంగా పెళ్లి జరిగింది. ముదిమి వయసులో పెళ్లి కొడుకైన పెద్దాయన గుర్రం ఎక్కి మరీ పెళ్లి మండపానికి వచ్చాడు. మూడు పదల వయసులో ఉన్న యువతి కూడా అంతే అందంగా ముస్తాబై పెళ్లి పీఠలు ఎక్కింది. పెళ్లికొడుకు మొదటి భార్య దగ్గరుండి మరీ అతిథి మర్యాదలు చూసుకుంది. రాజస్థాన్‌ ఈ అనూహ్య ఘటన చేటుచేసుకుంది.

ఇదండీ సంగతి... అయితే అసలు విషయం ఏమిటంటే... 'సుఖ్‌రాం భైరవ' అనే 83 ఏళ్ల పెద్దాయనకు సిరిసంపదలకు కొదవ లేదు. ఖరీదైన పొలాలతో పాటు దేశరాజధాని ఢిల్లీలో ఫ్లాట్ కూడా ఉంది. భార్య, కొడుకు, ఇద్దరు కూతుళ్లు కూడా ఉన్నారు. అయితే 20 ఏళ్ల కిందట కొడుకు అనారోగ్యంతో చనిపోవడంతో వారసుడు లేకుండా పోయాడు. దీంతో తన తర్వాత తన ఆస్తి ఏమైపోతుందో అనే బెంగతో పెళ్లికి సిద్ధమయ్యాడు. కొడుకు పుడతాడన్న ఆశతో మొదటి భార్య కూడా ఒప్పుకుంది. పేదింటి పిల్ల దొరకడంతో ఇక వెనకా ముందు చూసుకోకుండా పెళ్లి చేసుకున్నాడు.