పెళ్లి పేరుతో వంచన.. యువతిపై గ్యాంగ్ రేప్!

ఆ యువతి వయసు 23 ఏళ్లు. ఆమె హైదరాబాద్‌ నగరంలో బ్యుటీషియన్‌గా పని చేస్తోంది. ఇటీవల ఆమె ఒక పబ్‌కు వెళ్లినప్పుడు అక్కడ రిచ్ ఫ్యామిలీకి చెందిన ఓ యువకుడు పరిచయమయ్యాడు. ఆ కాస్త పరిచయంతోనే అతడు బాగా చనువు తీసుకున్నాడు. ఆ అమ్మాయికి పదే పదే ఫోన్లూ.. మెస్సేజ్‌లు చేయసాగాడు. అంతే వేగంగా.. పెళ్లి కూడా చేసుకుంటానని ఆమెకు నమ్మకం కలిగించాడు. శుక్రవారం (మే 5) రోజు.. ఇంట్లో ఎవరూ లేరని, ఇంటికి రావాలని ఆ యువతిని కోరాడు. ఆమె అంగీకరించకపోవడంతో బాగా ఒత్తిడి చేశాడు. పదే పదే ఫోన్లు చేయడంతో ఆమె మరుసటి రోజు మధ్యాహ్నం అతడిని కలవడానికి వెళ్లింది. అతడు తన కారులో ఆమెను నేరుగా నగర శివార్లలోని ఓ విల్లాకు తీసుకెళ్లాడు. అక్కడ ఓ గదిలోకి తీసుకెళ్లి ఆమెపై అత్యాచారం చేశాడు. ఆ తర్వాత ఆమెను గదిలోనే బంధించి, తన స్నేహితులైన మరో ఇద్దరిని ఇంటికి పిలిచాడు. ముగ్గురూ కలిసి ఆమెను బెదిరించి, యువతిపై అఘాయిత్యానికి పాల్పడ్డారు.

ఆ తర్వాత ఆమెను కారులో తిప్పుతూ.. అసభ్యకరంగా ప్రవర్తించారు. చివరికి రాత్రి 7.30 గంటల ప్రాంతంలో ఎస్‌.ఆర్‌.నగర్‌లోని ఓ జిమ్‌ వద్ద వదిలేసి వెళ్లిపోయారు. ఆ యువతి వద్ద డబ్బు లేకపోవడంతో జిమ్‌ వద్ద ఎదురుపడిన మరో యువతికి తన పరిస్థితి వివరించింది. ఆమె వద్ద రూ. 400 తీసుకొని, ఆటోలో ఇంటికెళ్లింది. ఆ తర్వాత జరిగిన ఘటనపై ఆమె పోలీసులకు ఫిర్యాదు చేసింది.

బాధితురాలి ఫిర్యాదు మేరకు పోలీసులు కొంపల్లిలోని ఫాంమెడోస్‌లో నివసించే ప్రీతంరెడ్డి (26)తో పాటు మరో ఇద్దరిపై కేసు నమోదు చేసి, దర్యాప్తు చేస్తున్నారు. ఆదివారం సాయంత్రం పోలీసులు సంఘటనా స్థలాన్ని పరిశీలించారు. నిందితుల్లో అధికార పార్టీకి చెందిన ఎమ్మెల్సీ కుమారుడు కూడా ఉన్నట్లు సమాచారం.