బరువు పెరిగారన్న కారణంతో ఉద్యోగులకు డిమోషన్!!

తమ సంస్ధలోని బరువు పెరిగిన కొంత మంది ఉద్యోగులను విమానయాన సంస్ధ ఎయిర్ ఇండియా గ్రౌండ్‌ డ్యూటీ విభాగానికి బదిలీ చేసింది. క్యాబిన్ క్రూ విభాగంలో విధులు నిర్వహిస్తున్న 57 మంది ఉద్యోగులు అధిక బరువు ఉన్నట్లు ఎయిర్ ఇండియా గత నెలలోనే గుర్తించింది. త్వరగా బరువు తగ్గకపోతే శాశ్వతంగా గ్రౌండ్ డ్యూటీ ఉద్యోగులుగా ఉండిపోవాల్సి వస్తుందని కూడా హెచ్చరించింది.

తాము విధించిన గడువులోగా బరువు తగ్గని వారిని గ్రౌండ్ డ్యూటీ విభాగానికి బదిలీ చేసినట్లు ఎయిర్ ఇండియా‌కు చెందిన ఓ సీనియర్ అధికారి తెలిపారు. బాడీ మాస్ ఇండెక్స్ ప్రకారం అధిక బరువు కలిగినవారిని గుర్తించామని అన్నారు. అధిక బరువున్నవారిలో చాలా మంది ఎయిర్‌హోస్టెస్‌గా విధులు నిర్వహిస్తున్నారు. ఈ విభాగంలో విధులు నిర్వహించడమంటే నెలకు సుమారు రూ.35 వేల నుంచి రూ.50 వేల అలవెన్సును కోల్పోయినట్లే. అధిక బరువు కలిగిన వారిని క్యాబిన్ క్రూ ఉద్యోగాలకు ఆరు నెలల పాటు అనర్హులుగా పరిగణిస్తారు. తిరిగి ఏడాదిన్నరలో సాధారణ స్థాయికి రాకపోతే శాశ్వతంగానే క్యాబిన్ క్రూ పోస్టులకు అనర్హులగా ప్రకటిస్తారు.