విమానం వెనక.. విమానం కట్టి..!

సాధారణంగా రోడ్డుపై ఏదైనా వాహనం చెడిపోతే.. దాన్ని తాళ్ల సాయంతో మరో వాహనానికి కట్టి లాక్కెళ్లడం గమనించే ఉంటారు. చెడిపోయిన కార్లను, ట్రాక్టర్లను ఇలాగే లాగుతూ తీసుకెళ్లడం మనం తరచూ చూస్తూనే ఉంటాం.. మరి విమానం ఇంజన్ చెడిపోతే, దాన్ని మరో విమానంతో లాక్కెళ్లి పోవచ్చా.. అనే సందేహం ఈ ఫోటోను చూస్తే రావొచ్చు! పాడైపోయిన విమానాలను కూడా లాక్కెళ్లిపోతారు. కాకపోతే, ఆకాశంలో మాత్రం అలాంటివి చేయలేం. అందులోనూ.. మరో విమానంతో అలాంటి సాహసాలు అసలే చేయరు. రన్ వేపై పాడైన విమానాలు, ఎయిర్‌పోర్ట్‌లో ఓ పక్కన ఉన్నవాటిని మాత్రం లాక్కెళ్లిపోవడానికి ప్రత్యేక వాహనాలు ఉంటాయి.

ఇక ఈ ఫోటో విషయానికి వస్తే.. ఇక్కడ మీరు చూస్తున్నది ఇంజన్ లేని విమానం. దీన్ని గ్లైడర్ అంటారు. గాలివాటం ఆధారంగా దీంట్లో విహరిస్తారు. అయితే, భూమి నుంచి కొన్ని వందల ఎత్తుకు చేరిన తర్వాతే.. అది ఎగరగలుగుతుంది. అక్కడి వరకూ దాన్ని ఇలా.. ఇంజన్ ఉన్న మరో విమానం లాగుతోందన్నమాట.

జర్మనీలోని ఫ్రాంక్‌ఫర్ట్‌ సమీపంలో గ్లైడర్‌ విమానక్షేత్రంపై మే 9న దర్శనమిచ్చిన ఈ దృశ్యాన్ని ఓ ఔత్సాహికుడు తన కెమెరాతో క్లిక్ మనిపించాడు. ఓ వ్యక్తి ప్రయాణించబోతున్న గ్లైడర్‌ను ఇంజన్‌ ఉన్న విమానం ఆకాశంలో లాగుతోంది. పైకి.. కొంత దూరం వెళ్లిన తర్వాత వదిలేస్తుంది.