గాలానికి చిక్కిన చేపను మొసలి లాక్కొని వెళ్తే!

వీకెండ్లో సరదాగా చేపలు పట్టడానికి తండ్రితో కలిసి దగ్గర్లోని చెరువుకు వెళ్లాడో అబ్బాయి. తండ్రి ఓవైపు ఉంటే 11 ఏళ్ల ఈ అబ్బాయి మరోవైపు ఉండి చేపల కోసం గాలం వేశాడు. ఓ పెద్ద ఎర్ర చేప గాలానికి చిక్కింది. ఇంకేం చేపను పట్టేద్దాం అనుకునే లోగానే అకస్మాత్తుగా వచ్చిన మొసలి దాన్ని నోట కరుచుకుని ఎత్తుకెళ్లింది. చేప గాలానికి చిక్కుకొని ఉన్నా.. మొసలి బలం ముందు అది తెగిపోయింది. చేప దొరికిందొచ్ అనుకునే లోగానే ఇలా మొసలి ఎత్తుకెళ్లడంతో ఆ పిల్లాడు అవాక్కు కాగా.. మొసలి మాత్రం పండగ చేసుకుంది.

ఈ తతంగం మొత్తాన్ని వీడియో తీసి ఫేస్‌బుక్‌లో పెడితే ఇప్పటి దాకా 12 మిలియన్ల మంది వీక్షించారు. ఏకంగా 2.65 లక్షల మంది షేర్ చేశారు. అమెరికాలోని సౌత్ కరోలినాలో ఉన్న జాన్స్ ఐలాండ్‌లో జరిగిందీ ఘటన. చేప దొరికితే వండుకొని తినే వాళ్లేమో కానీ.. దాన్ని మొసలి ఎత్తుకుపోవడంతో ఈ తండ్రీ కొడుకులకు బోలెడంత పబ్లిసిటీ వచ్చింది.