నోట్లరద్దు: ఆ ఆసుపత్రిలో సేవలు ఉచితం

నరేంద్రమోడీ సర్కారు పెద్ద నోట్లను రద్దు చేస్తూ తీసుకున్న నిర్ణయం వల్ల దేశంలోని అనారోగ్య పీడితులు, ఆసుపత్రిలో చికిత్స పొందుతున్న వారిపై ప్రభావం ఎక్కువగా పడిన సంగతి తెలిసిందే. పాత నోట్లను ఆసుపత్రుల్లో స్వీకరించాలని ప్రభుత్వం స్పష్టంగా చెప్పినా కూడా దాదాపు ఏ ఆసుపత్రీ దాన్ని పాటించడంలేదు. ఆసుపత్రులన్నీ పాత నోట్లను తీసుకోవడానికి నిరాకరించడంతో పేషెంట్లు, వారి బంధువులు పడుతున్న బాధలు ఇన్నీ అన్నీ కావు. కానీ, రాంచీలోని ఒక ప్రైవేట్ ఆసుపత్రి మాత్రం మిగిలిన ఆసుపత్రులను ఆదర్శంగా నిలుస్తోంది. మోడీ నిర్ణయం అమల్లోకి వచ్చిన తరువాత పేషెంట్లు పడుతున్న ఇక్కట్లను గమనించి తాము ఈ నిర్ణయాన్ని తీసుకున్నామని ఆసుపత్రి వర్గాలు తెలిపాయి. ఈ నెల 13వ తేదీ వరకు ఆసుపత్రిలో సేవలన్నీ ఉచితమేనని ప్రకటించడంతో వైద్యం కోసం రోగులు అక్కడ బారులు తీరారు. వారందరికీ ఆసుపత్రి వైద్యులు ఓపికగా సేవలందిస్తున్న తీరు అందరి మన్ననలు పొందుతోంది. మిగిలిన ఆసుపత్రులు కూడా అంతటి ఉదారంగా ఉచితంగా సేవలందించాలని ఎవరూ కోరకపోయినప్పటికీ.. కనీసం ప్రభుత్వం సూచించిన మాదిరిగా రూ.500, రూ.1000 నోట్లను స్వీకరించి వైద్యం చేస్తే చాలని ప్రజలు కోరుతున్నారు.