ఆ ఫ్యాన్లకు ఉరేసుకోలేరు...!

చదువుల ఒత్తిడి, కుటుంబకలహాలు, డిప్రెషన్ రకరకాల కారణాలతో అనేకమంది ఆత్మహత్య చేసుకుంటున్నారు. వారిలో ఫ్యాన్ కు ఉరివేసుకుని చనిపోయే వారి సంఖ్యే ఎక్కువ. అందుకే ఓ వ్యక్తి ఉరేసుకోవడానికి వీల్లేని ఫ్యాన్లు తయారుచేస్తున్నారు. అతని పేరు శరద్ ఆషాని. ముంబైలోని ఓ ప్రైవేటు కంపెనీలో జనరల్ మేనేజర్ గా చేసి రిటైర్ అయ్యారు. 2004లో ఓ మోడల్ ఫ్యాన్ కు ఉరేసుకుని ఆత్మహత్య చేసుకుంది. ఆ సంఘటన శరద్ పై తీవ్ర ప్రభావం చూపింది. ఉరి వేసుకున్నా కూడా మనిషి చావని ఫ్యాన్లను తయారు చేయాలని అనుకున్నారు. 12 ఏళ్లు కష్టపడి... ఇప్పటికీ సాధించారు. రెండు నెలల క్రితం నుంచి ఆ ప్రత్యేక ఫ్యాన్ల తయారీ కూడా మొదలుపెట్టారు.

జాతీయ క్రైమ్ రికార్డు బ్యూరో ఇచ్చిన సమాచారం ప్రకారం.. ప్రతి ఏడాది లక్షా 30 వేల మంది ఆత్మహత్య చేసుకుంటుంటే అందులో అరవై వేల మంది ఫ్యాన్లకు ఉరేసుకునే మరణిస్తున్నారు. ‘యాంటీ సూసైడల్ ఫ్యాన్లు’ తయారు చేసి అలా ఆత్మహత్య చేసుకునే వారిని అడ్డుకోవాలని శరద్ నిర్ణయించుకున్నారు. తాను అనుకున్నది సాధించారు. ఫ్యాన్ రాడ్ లో స్ప్రింగ్ సిస్టమ్ ను అమర్చారు. మనిషి దానికి వేలాడగానే... రాడ్ నుంచి స్ప్రింగ్ బయటికి వచ్చి మనిషికి ఏమీ కాకుండా నేల మీదే దించేస్తుంది.

ప్రస్తుతం శరద్ ఇలాంటి ఫ్యాన్ రాడ్ లను వంద తయారు చేశారు. నెలకు పదివేల వరకు తయారు చేసి అన్ని హాస్టళ్లకు ఇవ్వాలని అతని ప్లాన్.