వీడియో: విమానంలో మంటలు.. ఆదుకున్న ‘జ్యూస్’!

విమానం కొన్నివేల అడుగుల ఎత్తులో ఎగురుతోంది. ప్రయాణికుల తలపై ఉండే లగేజీ క్యాబిన్ నుంచి తెల్లని పొగ వస్తోంది. అంతా తొలుత ఏసీ పొగలై ఉంటాయనుకున్నారు. అయితే, అది కాలుతున్న వాసన అని తెలుసుకోడానికి ఎంతో సమయం పట్టలేదు. క్యాబిన్ తలుపు తీసి చూస్తే.. భగభగా మండుతున్న బ్యాగ్. ఆ మంటలు చూసి, ప్రయాణికుల ప్రాణాలు గాల్లో కలిసిపోయాయి. సమయానికి ఏం చేయాలో తోచలేదు.

ఇంతలో కొంతమంది ప్రయాణికులకు ఓ ఐడియా తట్టింది. వారి చేతుల్లో ఉన్న జ్యూస్‌, నీళ్లను మంటలపై పోశారు. లక్కీగా మంటలు ఆరిపోడంతో ప్రయాణికులంతా ఊపిరి పీల్చుకున్నారు. ఇంతకీ ఈ మంటలు ఎలా వచ్చాయనే కదా మీ అనుమానం?

ఇదేదో విద్రోహుల చర్య అనుకుంటే పొరపాటే. మొబైల్ పవర్ బ్యాంక్ ఒత్తిడికి గురై పేలిపోయి ఇలా మంటలు వచ్చాయి. అందుకే, లగేజ్ చెక్ చేసేప్పుడు పవర్ బ్యాంక్‌లు కూడా ఉండకూడదని సెక్యూరిటీ సిబ్బంది చెబుతుంటారు. ఇది ఎంత ప్రమాదకరమో తెలిపేందుకు ఈ ఘటనే నిదర్శనం. ఇకపై విమానాల్లో వెళ్లినప్పుడు పవర్ బ్యాంకులు వెంట తీసుకెళ్లకండి. ఈ ప్రమాదం ఫిబ్రవరి 25న చైనాలో గౌన్గ్‌జో నుంచి షాంగై‌కు వెళ్తున్న విమానంలో చోటు చేసుకుంది.