ఈ డ్రైవర్ మిస్టర్ యూనివర్స్ టైటిల్ గెలుస్తాడు, కానీ..!

బెంగళూరులో వాటర్ ట్యాంకర్ డ్రైవర్‌గా పనిచేస్తున్న జి. బాలకృష్ణ మిస్టర్ ఆసియా పోటీల్లో పాల్గొని రెండు టైటిళ్లను సొంతం చేసుకున్న సంగతి తెలిసిందే. ఆ పోటీల్లో అతడు ‘మిస్టర్ ఆసియా 2016’గా నిలవడంతో పాటు ‘ఆర్నాల్డ్ స్క్వాజ్‌నెగర్ ఆఫ్ వైట్ ఫీల్డ్’ టైటిల్‌ను సాధించాడు. ఇప్పటికే అనేక అంతర్జాతీయ స్థాయి టైటిళ్లను సాధించిన బాలకృష్ణ వచ్చే నెలలో జరగనున్న మిస్టర్ యూనివర్స్ చాంపియన్‌షిప్‌లో పాల్గొనాలని ఆరాటపడుతున్నాడు. కానీ అతడు ఈ పోటీల్లో పాల్గొంటాడా లేదా అనేది స్పాన్సర్లు దొరకడం మీదే ఆధారపడటం దురదృష్టకరం. ఆర్థిక ఇబ్బందుల కారణంగా అతడు ఇప్పటికే చాలా అంతర్జాతీయ పోటీలకు దూరంగా ఉండిపోవాల్సి వచ్చింది. ట్యాంకర్ డ్రైవర్‌గా సంపాదిస్తున్న కొద్ది మొత్తంతోనే అతడు తన ఆహార అవసరాలను తీర్చుకుంటున్నాడు. తనకు ప్రభుత్వ సాయం అందితే తప్పకుండా మరింత మెరుగైన ఫలితాలు సాధిస్తానని బాలకృష్ణ నమ్మకంగా చెప్పాడు. ఎమ్మెల్యే అరవింద స్వామి సహకారంతో అంతర్జాతీయస్థాయి పోటీల్లో పాల్గొంటున్నానని ఈ చాంపియన్ విజయ కర్ణాటకతో చెప్పాడు.

రామగొండనహళ్లిలో నివసించే బాలకృష్ణ జీవనోపాధి కోసం గతంలో జిమ్ ఇన్‌స్ట్రక్టర్‌గానూ పని చేశాడు. చిన్నతనంలోనే తండ్రిని కోల్పోయినప్పటికీ, వాటర్ ట్యాంకర్ డ్రైవర్‌గా సంపాదించిన మొత్తంతోనే అతడు బాడీబిల్డింగ్ చాంపియన్‌షిప్‌లకు సన్నద్ధమయ్యాడు. 15 ఏళ్ల వయసులో జిమ్‌కెళ్లడం మొదలు పెట్టిన బాలకృష్ణ.. 19వ ఏట నుంచి రాష్ట్రస్థాయి పోటీల్లో పాల్గొనడం ప్రారంభించాడు. కర్ణాటక బాడీ బిల్డింగ్ అసోసియేషన్‌తోపాటు సోదరుడు రాజేష్ సహకారంతో అతడు ఇప్పటి వరకు 90 చాంపియన్‌షిప్‌లలో పాల్గొని 48 టైటిళ్లను గెలుపొందాడు.

జూనియర్ స్టేట్ లెవల్ చాంపియన్‌షిప్‌లోనూ పాల్గొన్న బాలకృష్ణ మిస్టర్ కర్ణాటక టైటిల్‌ను కూడా సాధించాడు. ఎనిమిదిసార్లు జాతీయ చాంపియన్‌షిప్‌లో పాల్గొన్న అతడు ఏడు స్వర్ణాలు సహా ఒక వెండి పతకాన్ని గెలుపొందాడు. ఆరు అంతర్జాతీయ పోటీల్లో పాల్గొని 3 బంగారు, ఒక వెండి పతకాన్ని సాధించాడు. అండర్ 24 కేటగిరీలో 2013లో జరిగిన మిస్టర్ యూనివర్స్ టైటిల్‌ను గెలుపొందాడు. మరుసటి ఏడాది అదే విభాగంలో మిస్టర్ వరల్డ్ టైటిల్‌ను కూడా తన ఖాతాలో వేసుకున్నాడు. అంతర్జాతీయ స్థాయిలో టైటిళ్లు సాధిస్తూ.. భారతదేశ ఖ్యాతిని నలుమూలలకు చాటుతున్నఈ బాడీబిల్డర్‌కు ప్రభుత్వ సహకారం అందాలని కోరుకుందాం.