కొత్త రూల్.. అపార్ట్‌మెంట్‌కు ఒకే కుక్క!

బృహ‌త్ బెంగళూరు మహానగర పాలికే తీసుకున్న ఓ నిర్ణయంపై జంతు ప్రేమికులు భగ్గుమంటున్నారు. ఒక్క అపార్ట్‌మెంటులో ఒకే కుక్క ఉండాలని, వ్యక్తిగత నివాసాల్లో ఉండేవారి వద్ద మూడు కుక్కలకు మించకూడదని బెంగళూరు నగరపాలక సంస్థ కొత్త నిబంధన తీసుకొచ్చింది. అంతేకాదు వీటికి లైసెన్సులు కూడా తీసుకోవాలని సోమవారం నాడు ఉత్తర్వులు జారీచేసింది. ఈ నిర్ణయంతో యజమానులు తమ పెంపుడు జంతువుల గురించి ఆందోళన వ్యక్తం చేస్తుంటే, కుక్కలను వదులుకోవాల్సిన పరిస్థితి దాపురించిందని సామాజిక కార్యకర్తలు అంటున్నారు. తాజా నిబంధనల ప్రకారం శునకాలకు లైసెన్సులు తప్పనిసరి చేశారు. రేడియో కాలర్ ఉన్న చిప్‌ను లైసెన్స్‌లో పొందుపరుస్తారు. దీనికి అయ్యే ఖర్చులను సైతం యజమానే భరించాలి. ఒకవేళ లైసెన్స్ లేని పక్షంలో రూ.1,000 జరిమానా చెల్లించాలి.

బీబీఎంపీ ఆదేశాలతో పెంపుడు కుక్కల యజమానులు అందోళన చెందుతూ జంతు సంరక్షణ సంస్థలను సంప్రదిస్తున్నారు. గత రెండు రోజుల్లో సుమారు 35-40 మంది తమకు ఫోన్ చేసినట్టు సీయూపీఏ సంస్థకు చెందిన సంజన మందప్ప అన్నారు. గత అయిదేళ్లలో తమ అపార్ట్‌మెంట్‌లోని 40 శాతం మంది కుక్కలను పెంచుకుంటున్నారు... ఒక్క అపార్ట్‌మెంట్‌కు ఒకటే అన్ని నిబంధన వల్ల వారంతా ఆందోళన వ్యక్తం చేస్తున్నారని తెలిపారు. అధికారుల తీసుకున్న నిర్ణయంతో పెద్ద సంఖ్యలో పెంపుడు కుక్కలను వదులుకోవాల్సి ఉంటుందని అంటున్నారు.

మైక్రోచిప్, జరిమానాల లాంటి నిబంధనలతో చాలా మంది తమ పెంపుడు జంతువులను బయటకు తీసుకురారు.. అలాంటప్పుడు ఎన్ని కుక్కలన్నాయనేది అధికారులు ఎలా నిర్ణయించగలరని జంతు సంరక్షణ కార్యకర్త ప్రియాంక ఛెట్టీ రాజ్‌గోపాల్ అన్నారు. రెండు మూడు శునకాలను పెంచుకునే యజమానులు ఏమవుతారు.. వాటిని ఎక్కడ ఉంచుతారని ఆమె నిలదీశారు. బెంగళూరులో సుమారు 64 రకాల జాతుల కుక్కలను కలిగి ఉన్నారని బీబీఎంపీ అంటోంది.. అయితే ఇందులో పేర్కొన్న అఫెన్పిశ్చర్, కోటాన్ డీ ట్యూలీర్ లాంటి మడగాస్కర్ ప్రాంతానికి చెందిన జాతి కుక్కలు ఇండియాలో ఎలా జీవించగలవని ప్రశ్నించారు.

READ This Story in Kannada