కాపాడాల్సిన సీటు బెల్ట్.. బలి తీసుకుంది

కారులో వెళ్తున్నప్పుడు సీటు బెల్ట్ పెట్టుకోకపోవడం వల్ల ప్రాణాలు కోల్పోయిన వాళ్లున్నారు. కానీ సీటు బెల్ట్ పెట్టుకోవడం వల్లే చనిపోతే? అంతకంటే దారుణం ఉండదు కదూ. యాక్సిడెంట్ల సమయంలో కాపాడాల్సిన సీటు బెల్టే ఓ వ్యక్తి ప్రాణం తీసింది. కారు మంటల్లో చిక్కుకోవడంతో బెంగళూరుకు చెందిన 38 ఏళ్ల దిలీప్ కుమార్ సజీవ దహనమయ్యాడు. బెంగళూరు, కొచ్చిలో వ్యాపారాలు చేసే దిలీప్ తన భార్య, ఇద్దరు పిల్లలతో కలిసి కార్లో బెంగళూరు నుంచి కొచ్చి వెళ్తున్నారు. షార్ట్ సర్క్యూట్ కారణంగా కారుకు మంటలు అంటుకోవడంతో ఆయన కార్లోనే ప్రాణాలు వదిలారు.

భార్య, పిల్లలు ప్రమాదం నుంచి క్షేమంగా బయటపడినప్పటికీ.. డ్రైవింగ్ సీట్లో కూర్చున్న తాను సీటు బెల్ట్ తీసేలోగానే మంటలు వ్యాపించాయి. దీంతో బయటకు వచ్చే దారిలేక కార్లో దిలీప్ సజీవ దహనమయ్యాడు. కోయంబత్తూర్ సమీపంలోని మరప్పాలం టోల్‌గేట్ వద్ద ఈ ప్రమాదం చోటు చేసుకుంది. ఆ మార్గంలో వెళ్తున్నవారు సమాచారం ఇవ్వడంతో అగ్నిమాపక సిబ్బంది వచ్చి మంటలు ఆర్పారు. ఫోరెన్సిక్ నిపుణులు కారు తగలబడిపోవడానికి గల కారణాలు తెలుసుకోవడానికి ప్రయత్నిస్తున్నారు.