ఆకతాయికి దిమ్మతిరిగేలా షాకిచ్చిన యువతి!

బెంగళూరులో రద్దీ బస్సులో ప్రయాణిస్తున్న ఓ యువతిని వెనుక సీటులో కూర్చున్న ఓ వ్యక్తి అసభ్యంగా తాకడం మొదలుపెట్టాడు. ఎంతవారించినా.. ఏమీ పట్టన్నట్లుగా పదే పదే అదేపని చేస్తున్నాడు. కొద్ది నిమిషాల తర్వాత బస్సు ఒక్కసారి ఆగింది. ఏమిటా అని చూస్తే.. బస్సుకు అడ్డంగా పోలీస్ పెట్రోల్ వెహికిల్ ఉంది. బస్సులో ఉన్నవారికి ఏమీ అర్థకావడం లేదు.

పోలీసులు నెమ్మదిగా బస్సులోకి ప్రవేశించారు. అప్పటి వరకు యువతితో అసభ్యంగా ప్రవర్తించిన వ్యక్తి దగ్గరకు వెళ్లి నిల్చున్నారు. అతన్ని పట్టుకుని ‘‘అత్తారింటికి వెళ్దాం పదా’’ అన్నారు. దీంతో సదరు వ్యక్తి అమాయకంగా ముఖం పెట్టి ‘‘నేనేం చేశాను’’ అని అడిగాడు. బస్సులో ప్రయాణికుల మదిలో కూడా ఇదే ప్రశ్న. దీంతో.. పోలీసులు అసలు కథ చెప్పారు.

ఓ ప్రైవేటు సంస్థలో పనిచేస్తున్న మధుసూదన్ రావు (47) బుధవారం రాత్రి బీఎంటీసీ బస్సు ఎక్కాడు. అతడికి ఎదురు సీటులో కూర్చొన్న ఓ ఐటీ ఉద్యోగినిని అసభ్యంగా తాకడం మొదలుపెట్టాడు. తొలుత పొరపాటున తాకాడని భావించి ఆమె ఏమీ అనలేదు. ఆ తర్వాత అదేపనిగా చేతులు వేయడంతో వెనక్కి తిరిగి వారించింది. అప్పటికీ ప్రవర్తన మారకపోవడంతో... తన మొబైల్‌కు పని చెప్పంది. 100కు ఫోన్ చేయకుండానే పోలీసులను రప్పించింది.

బెంగళూరు పోలీసులు.. ఇటీవల ‘Know your police station’ (మీ పరిధిలోని పోలిస్ స్టేషన్ తెలుసుకోండి) అనే యాప్‌ను అందుబాటులోకి తెచ్చారు. అందులో ఫిర్యాదు చేసే సదుపాయం కూడా కల్పించారు. దీంతో ఆమె యాప్ ద్వారా పోలీసులకు ఫిర్యాదు చేసింది. వెంటనే పోలీసులు ఆమె ప్రయాణిస్తున్న బస్సును గుర్తించి... కేవలం 15 నిమిషాల వ్యవధిలోనే ఆమెతో అసభ్యంగా ప్రవర్తించిన వ్యక్తిని అదుపులోకి తీసుకున్నారు. ఆ యువతి చేసిన పని... ఇప్పుడు బెంగళూరులోని ఎంతోమంది మహిళలకు మార్గదర్శకంగా నిలుస్తోంది.