బ్లూ వే‌ల్ గేమ్‌పై నిషేధం..!

ఛాలెంజ్ పేరుతో పిల్లల్ని ఆత్మహత్యలకి ప్రేరేపిస్తూ.. ప్రపంచ వ్యాప్తంగా సంచలనం సృష్టిస్తున్న ‘బ్లూ వేల్ సూసైడ్ గేమ్’పై భారత ప్రభుత్వం ఉక్కుపాదం మోపింది. ఈ గేమ్‌కి సంబంధించిన లింక్‌లు ఏవైనా ఉంటే వెంటనే వాటిని పూర్తి స్థాయిలో తొలగించాలని గూగుల్‌తో పాటు ఫేస్‌బుక్, వాట్సాప్, ఇన్‌స్టాగ్రామ్ తదితర సోషల్ మీడియా సైట్స్‌ని ఆదేశించింది. దేశంలో ఇప్పటికే కొంత మంది పిల్లలు ఈ గేమ్ ప్రభావం కారణంగా ఆత్మహత్యలకి ప్రయత్నిస్తుండటంతో బ్లూ‌ వేల్‌ని నిషేధించాలంటూ తల్లిదండ్రులు డిమాండ్ చేస్తున్నారు.

50 రోజుల ఛాలెంజ్‌లో భాగంగా ఒక్కోరోజు ఒక్కో టాస్క్‌ని ఇస్తారు. మొదట్లో సులువుగా పూర్తయ్యే టాస్క్‌లు ఇస్తూ క్రమంగా.. పిల్లల్ని గేమ్‌కి బానిసలుగా మార్చుకుంటారు. అనంతరం శరీరాన్ని గాయపర్చుకోవడం.. చివరికి ప్రమాదకర సాహాసాలకి ఉసిగొల్పుతారు. అప్పటికే గేమ్‌కి బానిసలైన పిల్లలు ఆత్మహత్యలకి కూడా వెనకాడటం లేదు. ‘పిల్లలు బ్లూ వేల్ ఛాలెంజ్ కారణంగా ఆత్మహత్యలకి ప్రయత్నిస్తున్నారు. ఈ గేమ్‌కి సంబంధించిన లింక్‌లు ప్రత్యక్షంగా లేదా పరోక్షంగా మీ సైట్స్‌లో ఉంటే వెంటనే తొలగించండి’ అని అని ఐటీ మంత్రిత్వ శాఖ సదరు కంపెనీలకు తాజాగా లేఖ రాసింది.