అతను మరణించినా... జీవించే ఉంటాడు

ఇరవై ఏడేళ్ల ఆ యువకుడు ప్రాణాలతో లేకపోవచ్చు... కానీ అతని గుండె కొట్టుకుంటుంది, కళ్లు చూస్తాయి, కిడ్నీలు పని చేస్తాయి. అదెలా? మరొకరి శరీరాలలో. అదే అవయవదానం గొప్పదనం. గుజరాత్‌లోని భావ్ నగర్‌లో నివసించే రాజు ధాపా (27)కు బైక్ యాక్సిడెంట్ అయింది. అతడిని బ్రెయిన్ డెడ్‌గా ప్రకటించారు వైద్యులు. కుటుంబసభ్యులకు అవయవ దానం గురించి వివరించారు. వారు రాజు అవయవాలను దానం చేసేందుకు అంగీకరించారు.

వైద్యులు అతడి శరీరం నుంచి గుండె, కిడ్నీలు, లివర్, కళ్లు సేకరించారు. గుండెను ఆఘమేఘాల మీద హెలికాఫ్టర్లో ముంబై ఆసుపత్రికి పంపించారు. రాజు కళ్లు చూపు లేని ఇద్దరికి చూపును ప్రసాదించాయి. గుండె, రెండు కళ్లు, లివర్, రెండు కిడ్నీలు... ఆరుగురి జీవితాలలో ఆనందాన్ని నింపాయి.