కారులో వచ్చాడని పెళ్లికొడుకుపై దాడి!

కుల వ్యవస్థను కూల గొట్టడానికి అనేక ప్రయత్నాలు చేస్తున్నా.. చాప కింద నీరులా ఆ జాడ్యం విస్తరిస్తూనే ఉంది. దళిత వర్గానికి చెందిన ఓ యువకుడు తన పెళ్లి సందర్భంగా.. మండపానికి కారులో వచ్చాడని కొందరు వ్యక్తులు అతడిని చితగ్గొట్టారు. ఈ ఘటన మధ్యప్రదేశ్‌లోని ఛాతర్‌పూర్ జిల్లాలో చోటు చేసుకుంది. ఆ జిల్లాలోని దెరీ గ్రామానికి చెందిన ప్రకాశ్‌ భన్సల్‌ అనే దళిత వ్యక్తికి అదే గ్రామానికి చెందిన ఓ యవతితో పెళ్లి కుదిరింది. వీరి వివాహాన్ని శనివారం (మే 6) రాత్రి జరపడానికి పెద్దలు ముహుర్తం పెట్టారు. ఈ నేపథ్యంలో పెళ్లి వేడుకలకు సిద్ధమైన వరుడు.. చక్కగా డెకరేషన్ చేసిన ఓ కారులో మండపానికి బయలుదేరాడు. అది చూసిన కొంత మంది వ్యక్తులు అతణ్ని అడ్డగించి, కారులోంచి బయటకు లాగి చితకబాదారు. ఆ ప్రబుద్ధులు.. అడ్డొచ్చిన వారినీ వదలలేదు.

బంధువుల ఫిర్యాదుతో అక్కడికి చేరుకున్న పోలీసులు ఇద్దరిని అరెస్ట్‌ చేశారు. పరారీలో ఉన్న మరికొంత మంది కోసం గాలిస్తున్నారు. మధ్యప్రదేశ్‌లోని కొన్ని ప్రాంతాల్లో కుల జాడ్యం ఇంకా పతాక స్థాయిలో ఉంది. పెళ్లిళ్ల సమయంలో దళిత వర్గాలకు చెందిన వారు గుర్రాలు, వాహనాలపై ఊరేగడాన్ని అగ్ర కులాలకు చెందినవారు జీర్ణించుకోలేరు. ఫలితంగా ఇలాంటి ఘటనలు తరచూ చోటు చేసుకుంటున్నాయి.