నేషనల్ హైవేపై బస్సుల బీభత్సం!

నేషనల్ హైవేలపై ఎంత జాగ్రత్తగా వెళ్లినా.. ఒక్కోసారి చిన్న తప్పిదాలకే పెద్ద ప్రమాదాలు జరుగుతాయి. బస్సులు, లారీల లాంటి పెద్ద వాహనాలైతే మరింత అప్రమత్తంగా ఉండాలి. అలాంటి రహదారిపై ప్రయాణికుల ప్రాణాలను గాలికొదిలేసి అత్యంత ప్రమాదకరంగా బస్సులు నడిపారు ప్రైవేట్ బస్సు డ్రైవర్లు. ఎదురుగా వస్తున్న వాహనాలను కూడా లెక్క చేయకుండా ఇష్టం వచ్చినట్లు నడిపి భీతావహ వాతావరణాన్ని సృష్టించారు. అదృష్టవశాత్తు ఎలాంటి ప్రమాదం జరగలేదు. రెండు రోజుల కిందట జరిగిన ఈ ఉదంతాన్ని బస్సుల వెనకాలే బైక్‌పై వెళుతున్నవారు వీడియో తీసి సోషల్ మీడియాలో పెట్టడంతో.. వైరల్‌గా మారింది.

తమిళనాడులోని కోయంబత్తూరులో ఇద్దరు డ్రైవర్లు.. ఓ జాతీయ రహదారిపై రేసులో పాల్గొన్నట్లు పోటీపడుతూ బస్సులను పరుగెత్తించారు. ఒకరిపై ఒకరు ఆధిపత్యం చెలాయించాలనే ఉద్దేశంతో.. వేగంగా వెళుతూ అత్యంత నిర్లక్ష్యం ప్రదర్శించారు. పైగా ఆ రోడ్డుపై నిర్మాణ పనులు కూడా జరుగుతున్నాయి. అయినా.. పట్టించుకోకుండా ఒకరినొకరు ఓవర్‌టేక్ చేస్తూ.. బస్సులను ఇష్టమొచ్చినట్లు నడపడంతో ఎదురుగా వచ్చిన వాహనదారులకు గుండె ఆగినంత పనైంది. విషయం తెలుసుకున్న సబ్‌ కలెక్టర్‌ బస్సు యజమానులను పిలిపించి హెచ్చరించారు. ఆ డ్రైవర్ల లైసెన్సులు రద్దు చేశారు. ఆ బస్సులు వెళుతున్న మార్గంలో ప్రయాణికులు ఎక్కువగా ఉంటారట. వారిని ఎక్కించుకుని సొమ్ము చేసుకోవడానికి చాలా మంది డ్రైవర్లు ఇలా ప్రమాదకరంగా వెళుతుంటారని మరి కొంత మంది చెబుతున్నారు.