పిల్లలకు విషమిచ్చి, ఆత్మహత్యకు పాల్పడిన దంపతులు

భార్యాభర్తలు తమ ఇద్దరు పిల్లలకు విషమిచ్చి, అనంతరం వారు కూడా ఆత్మహత్యకు పాల్పడ్డారు. ఈ ఘటన మహారాష్ట్రలోని పుణేలో శుక్రవారం రాత్రి చోటుచేసుకుంది. నగరంలోని శివానేకు చెందిన వ్యాపారి నిలేశ్ చౌదరి (38), అతడి భార్య నీలమ్ (33), తమ ఇద్దరి కుమార్తెలు శ్రావణి (9), శ్రేయ (7)లకు విషమిచ్చి, తాము కూడా ఆత్మహత్యకు పాల్పడినట్లు పోలీసులు భావిస్తున్నారు. మృతదేహాలను పరిశీలించిన పోలీసులు భార్యాభర్తలు తమ ఇద్దరి పిల్లలతో విషం తాగించిన తర్వాత నీలమ్ కూడా విషం తీసుకున్నట్లు, నీలేశ్ ఉరేసుకున్నట్లు పోలీసులు అనుమానిస్తున్నారు. ఇంట్లోనే ఆత్మహత్యకు పాల్పడిన నిలేశ్, దీనికి ఆర్థిక సమస్యలే కారణమని తన సూసైడ్‌ నోట్‌లో పేర్కొన్నాడు.

వ్యాపారంలో నష్టాలు రావడంతో అప్పుల్లో కూరుకుపోయినట్లు సమాచారం. అంతేకాదు తాము చనిపోయిన తర్వాత అవయవాలను దానం చేయాలని అందులో సూచించారు. శుక్రవారం రాత్రి 9 గంటల ప్రాంతంలో ఈ ఘటన వెలుగుచూసింది. ఉరేసుకుని వేలాడుతోన్న నిలేశ్‌ను పక్క ఫ్లాట్‌లో ఉండే వ్యక్తి గమనించి, పోలీసులకు సమాచారం అందించాడని ఎస్ఐ స్వప్నాలి నికమ్ తెలిపారు. వ్యాపారంలో ఏర్పడిన నష్టం వల్ల సంభవించే పరిణామాలకు తన భార్య, పిల్లలను ఇబ్బందులకు గురిచేయడం ఇష్టంలేకే వారి జీవితాలను ముగించే తీవ్రమైన చర్య తీసుకున్నాడని ఆమె వ్యాఖ్యానించారు.

ఆత్మహత్యలపై సమాచారం అందుకున్న పోలీసులు అక్కడకు చేరుకుని, మృతదేహాలను పోస్ట్‌మార్టమ్‌కు తరలించారు. ఇద్దరు చిన్నారుల నోటి నుంచి నురగలు వచ్చిన ఆనవాళ్లను పోలీసులు గుర్తించారు. వారి పక్కన నీలమ్ అచేతనంగా పడిఉన్నారు. నీలేశ్ చౌదరి ఆత్మహత్యకు పాల్పడే ముందు గదిలోని సీలింగ్ ఫ్యాన్‌ తొలగించి, హుక్కునకు తాడుదూర్చి దాని సాయంతో ఉరేసుకున్నాడు. నిలేశ్ చౌదరి ప్లాస్టిక్ వస్తువుల ఉత్పత్తి వ్యాపారం చేసేవాడు. మూడేళ్ల కిందట బ్యాంకు నుంచి రుణతీసుకుని ఓ అపార్ట్‌మెంట్ సైతం కొనుగోలు చేశాడు. ఇటీవల కొత్త యంత్రాలను కొనుగోలు చేయడానికి నీలేశ్ రుణం తీసుకున్నాడు.