పామును ప్రేమించి పెళ్లాడిన మహిళ!!

ఓ యువతికి చిత్రమైన ప్రేమ వివాహం జరిగింది. ఒడిశా ఖుర్ధా జిల్లాలోని అతాల్ గ్రామంలో బిమ్‌ బాలా అనే మహిళ ఇంట్లో ఒక పుట్ట ఉంది. ఆ పుట్టలో నివాసం ఉండే ఒక పాము రోజూ బయటకు వచ్చి బిమ్ బాలా పోసిన పాలు తాగి, ఆమె ఒడిలో కాసేపు సేదదీరుతుంది. ఆ తర్వాత మళ్లీ పుట్టలోకి వెళ్లిపోతుంది. పామును దేవతగా ఆరాధించే నమ్మకంతో తమది జన్మ జన్మల బంధమని భావించిన బిమ్‌ బాలా కొన్నాళ్లకు పాముతో ప్రేమలో పడింది. దీంతో ఆ పామునే వివాహం చేసుకోవాలని నిర్ణయించింది.

కుటుంబ సభ్యులు, గ్రామస్తులు ఆమె చిత్రమైన నిర్ణయానికి హర్షం వ్యక్తం చేయడం గమనార్హం. అంతేకాదు చాలా కాలంగా బిమ్ బాలా పోసే పాలు తాగి సేదదీరుతున్నా ఆ పాము ఎప్పుడూ కరవడానికి ప్రయత్నం చేయలేదని పేర్కొంటున్నారు. కాబట్టి పాము కూడా ఆమెను ప్రేమిస్తోందని భావిస్తున్నామని వారు తెలిపారు. దీంతో బిమ్ బాలాకు, పాముతో వివాహానికి ముహూర్తం నిర్ణయించారు. కానీ ముహూర్త సమయానికి వరుడు మాత్రం పుట్టలోంచి బయటకు రాకపోవడంతో పాము బొమ్మతో తంతు కానిచ్చేశారు. పురోహితుల వేదమంత్రాల నడుమ ఈ కార్యక్రమం వైభవంగా జరిగింది. ఈ విచిత్రమైన వివాహానికి 1500 మంది అతిథులు హాజరుకావడం విశేషం.