ఇంటిని ఖాళీ చేయమన్న ఓనర్‌ను లేపేశారు!

ఇంటిని ఖాళీ చేయమని సూచించడంతో అద్దెకున్న మహిళ యజమానురాల్ని హత్య చేసిన ఘటన చెన్నైలో వెలుగు చూసింది. సుగంతి అనే 35 మహిళకు యోహాన్ అనే 26 ఏళ్ల యువకుడితో లైంగిక సంబంధం ఉంది. వారి వ్యవహారం నచ్చని యజమాని ధనలక్ష్మీ ఇంటిని ఖాళీ చేయమని సూచించింది. దీనికి ఆగ్రహించిన సదరు మహిళ తన బాయ్ ఫ్రెండ్‌తో కలిసి ఆమెను దారుణంగా హత్య చేసింది. గంటల వ్యవధిలోనే హత్యకేసును చేధించిన పోలీసులు సుగంతిని ఆమె బాయ్ ఫ్రెండ్‌ను అరెస్ట్ చేశారు.

దాదాపు ఇలాంటి కారణంతోనే ఓ యువకుడు మహిళా లాయర్‌ను హతమార్చాడు. ఇలా ఆరు రోజుల వ్యవధిలో చెన్నై పోలీసులు 8 మర్డర్ కేసులను పరిష్కరించారు. ఈ కేసులకు సంబంధించి 28 మంది అనుమానితుల్ని అరెస్ట్ చేశారు. నాలుగు హ్యతకేసులు చాలా కాలంగా అపరిష్కృతంగా ఉండిపోవడం స్థానికుల ఆగ్రహానికి కారణమైంది. దీంతో ఇక ఉపేక్షించి లాభం లేదని భావించిన పోలీసులు వాటి మిస్టరీని చేధించారు. శుక్రవారం ఒక్కరోజే మూడు హత్య కేసులకు సంబంధించి ఆరుగుర్ని అరెస్ట్ చేశారు. 60 ఏళ్ల వృద్ధుణ్ని హత్య చేసిన కేసులో నేపాల్‌కు చెందిన ముగ్గురు యువకుల్ని తీనామ్‌పేట్ పోలీసులు అరెస్ట్ చేశారు. గత నెల చివరి రోజున ఒక గ్యాంగ్ రౌడీ షీటర్‌ను హత్య చేసింది. ఈ కేసులో ఆరుగుర్ని పోలీసులు అదుపులోకి తీసుకున్నారు. రెవెన్యూ ఇన్స్‌పెక్టర్‌ను హత్య చేసిన కేసులో ఐదుగుర్ని నవంబర్ 2న పోలీసులు అరెస్ట్ చేశారు.