హైవేలపై స్పీడ్ బ్రేకర్లు... విమర్శిస్తున్న పౌరులు!

జాతీయ రహదారులపై ఏర్పాటు చేసిన స్పీడ్ బ్రేకర్లపై పౌరులు అసహనం వ్యక్తం చేస్తున్నారు. రహదారుల వెంబడి స్పీడ్ బ్రేకర్లు ఇంత ఎత్తుగా ఏర్పాటు చేయడాన్ని తప్పుబడుతున్నారు. దీని కారణంగా రహదారులపై వాహనాల వేగం మందగించడమే కాకుండా కొన్ని ప్రమాదాలకు కారణమవుతున్నాయని అంటున్నారు. ముంబయి- బెంగళూరు నాలుగో నెంబరు జాతీయ రహదారి విస్తరణ పనులు రెండేళ్ల కింద ప్రారంభమైనా ఇప్పటి వరకూ పూర్తి కాలేదు.

దీని వల్ల వాహనదారులు ఇనేక ఇబ్బందులు ఎదుర్కొంటున్నారు. వీటికి తోడు స్పీడ్ బ్రేకర్లను ఏర్పాటు చేయడం కూడా ఇబ్బందులు పడుతున్నట్లు ఫిర్యాదు చేస్తున్నారు.
జాతీయ రహదారులపై వాహనాలు వేగంగా ప్రయాణిస్తాయి...ఈ స్పీడ్ బ్రేకర్ల కారణంగా చోదకులు హఠాత్తుగా బ్రేకులు వేసి వేగాన్ని నియంత్రించడానికి ప్రయత్నిస్తే ప్రమాదమని ముంబైలోని వర్జేకి చెందిన అశోక్ మోరే పుణే మిర్రర్‌తో అన్నారు.

వీటి ఏర్పాటు తెలియని చాలా మంది ప్రమాదాల బారిన పడుతున్నారని మరో వ్యక్తి జిత్రేంద్ర కోష్ఠి తెలిపారు. చాలా మంది డ్రైవర్లు జాతీయ రహదారులపై స్పీడ్ బ్రేకర్ల ఉండవని భావిస్తారని ఆయన తెలియజేశారు. అయితే సుప్రీంకోర్టు ఆదేశాల ప్రకారం హైవేలపై స్పీడ్ బ్రేకర్లను తొలిగించాలని సెంట్రల్ ఇన్‌స్టిట్యూట్ ఆఫ్ రోడ్ ట్రాన్స్‌పోర్ట్ నిపుణుడు ప్రశాంత్ కాకడే అన్నారు.

సుప్రీంకోర్టు మార్గదర్శకాల ప్రకారం జాతీయ రహదారులను అనుసంధానం చేసిన మైనర్ రోడ్లపైనే ఏర్పాటు చేయాలి. ట్రాఫిక్ పోలీసుల అనుమతితోనే తాము స్పీడ్ బ్రేకర్లు ఏర్పాటు చేస్తున్నామని నేషనల్ హైవేస్ అథారిటీ ఆఫ్ ఇండియా ప్రాజెక్ట్ డైరెక్టర్ సుహాస్ చిట్నీస్ అన్నారు. రోడ్డు విస్తరణ పనుల కోసమే వాటిని ఏర్పాటు చేశారని, పని పూర్తయిన తర్వాత తొలగించాలని తెలిపామని వర్జే ట్రాఫిక్ డివిజన్ ఇన్‌స్పెక్టర్ ఎస్డీ పాటిల్ తెలిపారు.