జయలలిత పేరిట నెట్‌లో ప్రత్యక్షమైన ఆడియో

తమిళనాడు సీఎం జయలలిత అనారోగ్యంతో ఆస్పత్రిపాలైన ఘటన తమిళతంబీలని ఆందోళనకి గురిచేస్తోంది. మరీ ముఖ్యంగా ఆమె ఆరోగ్యం గురించి ఎప్పటికప్పుడు తాజా పరిస్థితిని మీడియాకు వివరించకుండా గోప్యంగా వుంచుతున్నారంటూ కొంతమంది అభిమానులు ఆస్పత్రి ఎదుట నిరసనలకి దిగుతున్నారు. అమ్మ ఫోటోని విడుదల చేయాలని, ఆమెని ఒక్కసారి మీడియా ముందుకు తీసుకురావాలని... ఇలా రకరకాల డిమాండ్లు వినిపిస్తున్నాయి.

ఈ నేపథ్యంలోనే సోమవారం ఆన్‌లైన్‌లో ప్రత్యక్షమైన ఓ ఆడియో ఫైల్ తమిళనాట సంచలనానికి కారణమైంది. అపోలో ఆస్పత్రిలో చికిత్స పొందుతున్న అమ్మ తమిళతంబీలని ఉద్దేశించి మాట్లాడినట్టుగా నమ్మిస్తున్న ఆడియో సంభాషణ ఒకటి సోషల్ మీడియాలో సందడి చేసింది. త్వరలోనే రానున్న స్థానిక సంస్థల ఎన్నికల్లో ఏఐఏడీఎంకే పార్టీకే ఓటేయాల్సిందిగా ఆమె ప్రస్తుతం చికిత్స పొందుతున్న అపోలో ఆస్పత్రి నుంచే కోరినట్టు ఆ ఆడియో ఫైల్ స్పష్టంచేస్తోంది. మొదట్లో ఈ ఆడియో ఫైల్ నిజమే అని నమ్మిన తమిళతంబీలు ఆ తర్వాత అది నిజం కాదు అని తెలిసి అవాక్కయ్యారు. మిమిక్రీ బాగా తెలిసిన వాళ్లెవరో జయలలిత మాట్లాడినట్టుగా మాట్లాడి జనాన్ని నమ్మించే ప్రయత్నం చేశారని తెలిసి అందరూ షాకయ్యారు.