నాగుపామును ముద్దు పెట్టుకోబోయి యువకుడి మృతి

నాగుపాముని ముద్దుపెట్టుకుని, ఆ ఫోటో, వీడియోలు ఫేస్‌బుక్‌లో పోస్ట్ చేసి పాపులర్ అవుదామనుకున్న ఓ యువకుడు అర్దాంతరంగా తనువు చాలించాడు. నాగుపాముని ముద్దు పెట్టుకునే విన్యాసంలో అది కాటేయడంతో ఆ యువకుడు మృతి చెందిన ఘటన ఇది. ముంబైలోని బేలాపూర్‌కి చెందిన 21 ఏళ్ల సోమ్‌నాథ్ మాత్రే పాములని పట్టుకుని వాటితో ఆటలాడుతూ, ముద్దు పెట్టుకుంటూ ఫోటో, వీడియోలకి ఫోజివ్వడం అలవాటుగా చేసుకున్నాడని అతడి ఫేస్‌బుక్ ప్రొఫైల్ చూస్తే అర్థమవుతోంది.

ఫిబ్రవరి 2న కూడా అలాగే ఓ నాగుపాముకు ముద్దివ్వబోయిన మాత్రేకు ఆ ప్రయత్నం బెడిసికొట్టింది. ముద్దు పెట్టుకునే క్రమంలోనే ఆ నాగుపాము కాటేయడంతో, ఆస్పత్రిలో చికిత్స పొందుతూ మూడు రోజుల తర్వాత మాత్రే మృతిచెందాడు. మాత్రే మరణం మరోసారి జంతువుల సంరక్షణ కోసం ప్రత్యేకమైన చట్టాల్ని తీసుకురావాల్సిన అవసరం వుందని చాటిచెబుతోందంటున్నారు జంతు ప్రేమికులు. ఇకనైనా ఈ తరహా విన్యాసాలపై నిషేధం విధించకపోతే, ఇంకొంతమంది యువత ఇలా విష సర్పాలతో విన్యాసాలు చేసి మృతి చెందే ప్రమాదం వుందని సదరు సంఘాలు ఆందోళన వ్యక్తంచేస్తున్నాయి.

గత 12 ఏళ్లలో దాదాపు 30 మంది పాములని పట్టుకునేవాళ్లు ఇలా మృతిచెందారని నివేదికలు చెబుతున్నాయి. అయితే, జంతు ప్రేమికుల విజ్ఞప్తిపై ముంబై సర్కిల్‌కి చెందిన అటవీ శాఖ అధికారి స్పందించారు. సాధారణంగా జంతువుల సంరక్షణ అంశానికి సంబంధించినంత వరకైతే ఇప్పటివరకు 'వైల్డ్ లైఫ్ ప్రొటెక్షన్ యాక్ట్, 1972' చట్టాన్ని అనుసరిస్తున్నాం. కానీ ఇలా జంతువులు, సర్పాలతో విన్యాసాలు చేసే ట్రెండ్ పెరిగిపోతోంది అనుకుంటే, ఇంకొన్ని కొత్త చట్టాలు రూపొందిస్తాం అని స్పష్టంచేశారు.