పిచ్చుకకు అంత్యక్రియలు.. పక్షి ప్రేమికుడి ఔదార్యం

ఓ పక్షి ప్రేమికుడు ప్రమాదవశాత్తూ మరణించిన పిచ్చుక పిల్లకు అంత్యక్రియలు నిర్వహించి అందరి దృష్టిని ఆకర్షించాడు. కోయంబత్తూరు సమీపంలోని ఇదికరై గ్రామవాసి సెల్వరాజ్‌కు పక్షులంటే ప్రాణం. తన ఇంటి వెనకాల ఖాళీ స్థలంలో కొంత భాగాన్ని ప్రత్యేకంగా వాటి కోసమే కేటాయించాడు. అక్కడ రకరకాల చెట్లను పెంచి వివిధ పక్షులకు ఆవాసాన్ని ఏర్పాటు చేశాడు. అంతేకాకుండా నిత్యం వాటి కోసం నీటిని, ఆహార గింజలను అందిస్తున్నాడు. దీంతో పావురాలు, పిచ్చుకలతో పాటు కొన్ని రకాల పక్షులు.. కొంత కాలంగా సందడి చేస్తున్నాయి. సెల్వరాజ్ కనిపించగానే.. కిచ్ కిచ్ అంటూ.. ఆయన భుజాలపై వాలిపోయి ప్రేమ కురిపిస్తాయి.

అయితే పక్షుల కోసం ఏర్పాటు చేసిన నీటి తొట్టెలో పడి ఓ పిచ్చుక పిల్ల మరణించింది. అది చూసి సెల్వరాజ్ తీవ్రంగా కలత చెందాడు. తన కుటుంబంలోని వ్యక్తిని కోల్పోయినంతగా బాధపడ్డాడు. దీంతో దానికి అంత్యక్రియలు కూడా జరిపించాడు.

‘మనకు పిల్లలు ఎలాగో.. పక్షులు కూడా అలాగే.. ముద్దుగా చూసుకుంటే అవి ఎంత ఆహ్లాదం పంచుతాయి. అలాంటి ఓ పక్షి మరణించడంతో నా గుండె చెరువైంది. అందుకే ఇలా చేశాను’ అని సెల్వరాజ్ అంటున్నాడు. పిట్టలనగానే ఇంతెత్తున లేచి కొట్టిపడేసే వాళ్లకు సెల్వరాజ్ మంచి సందేశం ఇస్తున్నాడు కదా..!